News report la kâwia Health minister Tihhmingchhiat tumah MNF an puh

Congress party chuan thuchhuah siamin, Mizorama medical college, Mizoram Institute of Medical Education & Research (MIMER) din tum chungchangah MNF chu news report la kâwi a, Health minister Lal Thanzara tihhmingchhiat tumah an puh.

MPCC Media department thuchhuah chuan, MNF party-in news report an la kâwi leh thu dik ziktluak lo hmanga Health Minister hmai tihmâwk an tum chu an dem thu a tarlang.

Congress party tarlan danin, Mizoram sorkarin medical college din a duh a, sorkar laipuia a dil angin Central-in a phalsak a; a theih ang anga Falkawna State Referal Hospital chei ṭhat a nih hnuah endik turin Medical Council of India (MCI)-ah kum 2014 khan dilna thehluh a ni.

Mahse, medical college turin khum 300 a awm a ngaih avangin MCI chuan Mizoram sorkar dilna chu a hnawl a; chumi hnuah Ministry of Health & Family Welfare-in hmarchhak state-te tan bik ngaihhnathiamna neiin khum 300 chu 250-ah a tihniam a ni. Mizoram sorkar chuan Central-ah dilna a thlen leh a, chu chu Ministry of HFW chuan November 30, 2015-ah a ngaihtuah.

Central aṭangin thu lawmawm a awm mai loh avangin February 12, 2016 khan Health minister Lal Thanzara'n Union Health minister Dr Jagat Prakash Nadda chu DO letter-in a zawt chiang tih sawiin, MPCC chuan, "Union Health Minister hian rawn chhángin, medical college tur endik leh tura dilna siam thar turin thurâwn a rawn pe a ni," an ti.

MPCC chuan, medical college din turin tehfung a tam avangin vawi khatnaah tlin mai a har tih sawiin, hmarchhaka state dangte pawh an vawi khatnaah an hlawhtling lo fo niin an sawi a; medical college din tum chu MCI-in a pawm ngei theih nan Mizoram sorkarin theihtawp a chhuah mek thu an sawi bawk.