Truck-in in a hnâwl, mi pakhat thi

Nimin zing khawvar hma, dar 3:30 vel khan Aizawl lam pana tlân truck AS-11 AC-6968 chuan Tachhip khuaah Lalrokima s/o Thanzuala in, Assam type, kawngpui âna awm chu a hnâwl a; kawng thlangah ft. 150 vel lum zuiin, truck-a chuang mi pakhat a thi.

Thu dawn danin, truck hian Lalrokima te in hi a su darh vek a, truck leh in chu kawng thlakah an tla a ni. Ina muhil mek Lalrokima, a nupui Tlanthangi leh an fate pali - mipa leh hmeichhia pahnih ve vete chu kawng thlangah an tla vek a; an hliam vek a ni.

Truck-a chuang Chak-ma nula pakhat a thi a; a bag-a a matric certificate-a a inziah danin, Bawidi Tongchongya (20 vel) d/o Birolokia Tongchongya a ni. Lalrokima te chhungkua bakah, truck-a chuang ve dang mi pathumte pawh an hliam a; an vaiin State Referral Hospital, Falkawnah lak an ni a, Lalrokima leh Tlanthangi te chu Aizawl lamah thawn leh an ni.