MES written exam result chhuak har

Mizoram Public Service Commission (MPSC) chuan PHE leh Power & Electricity department-a thawk tur Mizoram Engineering Service lakna atana November 24-27, 2015 chhunga writen exam an buatsaih chu tun thlengin result a la tichhuak lo. Department lam hotute chuan an indaih loh avang-in result hi tihchhuah thuai ni se an duh thu an sawi.

MPSC website-a tarlan danin, MES junior grade lak tur zat hi paruk a ni a, P&E department-a thawk tur pali leh PHE depatment-a thawk tur pahnih a ni. Nikum November 24-27-a exam neih tawh chu thla nga hnuah pawh tun thlengin exam result an la tichhuak lo a ni.

Zawhna chhangin MPSC hotute chuan, result a chhuah har chhan chu paper evaluation a kal kual tam vang leh MPSC silver jubilee lawm tura an inbuatsaih vang a nih thu an sawi a; evaluation chu zawh a ni tawh a, an compile dawn hnaih tawh thu leh, May thla chawhma lamah result a chhuah hman an beisei thu an sawi bawk.

Hetih lai hian, PHE leh P&E department hotute chuan, an department ve veah engineer-te an indaih lo tih an sawi a; an department-a thawk tur MES lakna chu tihfel thuai ni se an duh thu leh an nghahhlelh thu an sawi a ni.