Sorkar leh loh tur chhan kan nei lo - Lal Thanhawla

MPCC president leh chief minister Lal Thanhawla chuan nimin khan Congress Bhavan-ah thu sawiin, "Kum 2018 inthlanah sorkarna kan chan leh lohna chhan tur kan nei lo," a ti a; sorkarna an chan leh ngei tur thu a sawi.

Lal Thanhawla chuan, "Kan party hian sorkarna kan chan leh ngei a ngai. Kan sorkar loh chhungin kan ram hmasawnna tura kan hnathawh tam tak tihchhiat a ni a, kan awm loh ramin a tuar hle. Term khat kan sorkar leh chuan Mizoram hmasawnna hnathawh tur hna thawh tihchhiat theih tawh lo turin kan siam hman bakah, a leh pek sorkar zel chu a harsa tawh lo ang," a ti.

Kum 2018 inthlanah sorkarna an chan leh dawn avangin dâwtin an party hruaitute hêk an ni dawn tih sawiin MPCC President chuan, "Report kan dawng zel a, khawi bialah mah kan hniam lo. Sorkar lohna chhan tur kan nei lo a, kan sorkar lohna chhan awmchhun chu keimahni a ni," a ti a; amah leh a thawhpui minister-teah eptute'n sawichhiatna tur an hriat loh thu a sawi.

Political party a tam tulh tulh dawn tih sawiin CM Hawla chuan, "PRISM pawh political party-a inleh an tum a ni. Party a tam ang a, an thawkho thei si lo ang. Kil thum kil aṭanga kan inbeih phei chuan sorkarna kan chang chiang sa a ni," a ti.

MPCC President chuan, an party mite chu sorkarna an chan avangin hausa thûr thûr lo mah se, Congress-a an awm avanga Zoramin hma a sawn phah avanga lawm turin a chah a ni.

Lal Thanhawla chuan NLUP term a tawp ṭêp tawh tih sawiin, "Central aṭangin sum tam tak NLUP-ah kan beisei tawh lo. Chuvangin, New Economics Development Policy (NEDP) duan mek a ni a, hemi hmang hian NLUP vanga hlawhtling tawhte'n sum tam zawk an hmuh theihna tur ngaihtuah a ni dawn," a ti.

MPCC President sawi danin, a kaihhruai sor-kar chuan an manifesto-te tihlawhting turin theih-tawp an chhuah a, ṭhalaite khawvel thar siam an intiam pawh theihtawp chhuahin an tihhlawhtling chho zel a ni.