KHAWTHLIR

MIS thlah

Mizoram Information Service (MIS) training zote chu nimin khan Administrative Training Institute (ATI) conference hall-ah thlah an ni a, IPR secretary B Lalthanliana'n training chhuakte chu certifcate a hlan. MIS training zo hi mi pali an ni.

Kawng hawng

Ṭawipui South Minpui Veng aṭanga damdawi-in panna kawng, metre 207-a thui siam thar chu Ningani khan bialtu MLA S Laldingliana, Lunglei HPC vice chairman-in a hawng. S Laldingliana chuan, hmasawnna tur chuan sum ringawt rinchhan lo a, a ṭul hunah chuan khawtlang mipuite insenso ngamna a ṭul thu a sawi.

Zunthlum zirho

World Diabetes Foundation, Denmark bultumin Open Doors chuan April 28, 2016 khan Health Worker Training Centre, Kulikawnah health worker zirlai 82-te hnenah zunthlum chungchangah zirtirna hun an hmang.

Duhsakna hlan

Aizawl Taxi Workers Union (ATWU) chuan thuchhuah siamin, hna thawktute ni, World Labors Day / May Day, May 1-a lo thleng tur pualin taxi-a hna thawktute leh Mizorama hna thawk zawng zawngte chibai an bûk a; an hnathawhnaah malsawmna dawng zel turin duhsakna an hlan.

Sum hman dan tur rel

Nimin khan Lunglei College-ah Lunglei DC hoin RUSA aṭanga sum hmuhte hman dan tur an rel a; college Board of Governor-te bakah, YMA leh MHIP-a Lunglei sub-headquarters hruaitute an tel. Lunglei College hian RUSA aṭangin Infrastructure Grant Rs. 23,75,000 leh Equity Initiatives Grant Rs. 10,41,667 an hmu a ni.

PRISM meeting

PRISM chuan nimin khan Vanapa Hall-ah General Body Meeting vawi 11-na an hmang. Chawhma lamah an kal zel dan tur an sawiho a, chawhnuah action plan 2016-17 leh budget 2016-17 an pharh a; pawl hruaitu thlan erawh chu quorum an tlin loh avangin an ti thei lo.