Cleanliness Movement Day hman a ni

Nimin khan Mizoram dis-trict headquarters tinah Clean-liness Movement Day 2016 hman a ni a; Aizawl district-ah chuan SSA Mission, Aizawl district bultumin Mizo High School Field, MacDonald Hill-ah hman a ni.

Cleanliness Movement Day hman a nih chhan hi, sorkar laipuiin India ram puma faina lama hmalakna tur programme, Swachh Bharat - Swachh Vidya-laya a kalpui vang a ni. Swachh Bharat - Swachh Vidyalaya bawhzuiin Mizoram SSA chuan ruahmanna a siam a, sikul leh zirlaite faina kawnga hma an sawn theihna turin Cleanliness Day hi a siam a ni.

Aizawla Cleanliness Day hmanna hi SSA district project coordinator Zoliani Hmante-in a kaihruai a, District Education Commttee chairman Kannan Gopinathan, Aizawl DC khual-lian a ni. Khuallian chuan, “Naupan laiin kut kan sil puat ṭhin a, a tâwk lo; fai taka kut sil ṭhin tur a ni. Kawngpui dung vawi khat tihfai a tâwk lo a, tibawlhhlawhtu nih loh a ngai a, faina hi hriselna bul a ni," a ti.

Cleanliness Movement Day puala inkhawmah hian SSA block level-a sikul fai thlan 15, district level-a sikul fai thlan pathum leh district level-a painting competition-a ti ṭhate hnenah lawmman sem a ni. Aizawla middle school 26 aṭang-in zirlai 1,000 chuang an kal khawm a; hlawm thumah inṭhen- in, Aizawl khawpui chhung thenfai hnatlang an nei nghal.

Aizawl district-a sorkar sikul zinga sikul fai bera thlan chu Saitual M/S-I a ni a, ITI Veng M/S chu pahnihna niin, Chaltlang M/S chu pathumna a ni. Lemziaka intihsiakah Lalmuanpuii, PC Girls School pakhatna a ni a; C Laldinthari ITI Veng M/S leh Fredy Rosangzuala, Chaltlang M/S pathumna a ni.

Lungleiah chuan Clean-liness Movement Day hi Electric Veng Middle School-ah hman a ni a; SSA Dy.DPC Kawlkunga Colney tarlan danin, kum 2015-2016 atana sikul 453 tan êk-in tihfaina tur sikul pakhatah Rs. 453 zel an dawng a, intihsiakna atan naupang 1,000 tan naupang pa-khatah Rs. 45 zel an dawng bawk.

Sikul faite hnenah lawmman hlan a ni a; district level-ah pakhatna Zotlang P/S-I, pahnihna Rahsi Veng M/S-II leh pathumna DM M/S, Theiriat an ni. Faina kawnga lem inziaksiakah pakhatna Lalremruata, Rahsi Veng M/S-II; pahnihna Ram-dinliana Khiangte, Zohnuai M/S leh pathumna Lalnunmawia, Ṭhaizawl M/S an ni.

Kolasib district-ah chuan Diakkawn YMA Hall-ah hman a ni a, Kolasib DC H Lal-eng--mawia khuallian a ni a, lawm-mante a hlan.

District level-a sikul fai berah Lungdai M/S-I thlan a ni a, TS Luaia M/S, Kolasib leh Bilkhawthlir P/S-III chu pahnihna leh pathumna an ni. Lemziaka intihsiakah pakhatna Lalduhsanga, St. Maria Goretti M/S, Kolasib; pahnihna Lalrinsanga, Meidum M/S leh pathumna R Lalhmingmawii, Chanmari UPS, Kawnpui-te an ni.

Champhai chuan Kahrawt Field-ah an hmang a, sikul fai thlan chhuahte leh lemziaka inelnaa ti ṭhate hnenah lawm-man hlan a ni.

Champhai district-a sikul fai bera thlan chu Samthang M/S a ni a, Rabung P/S-I leh Hliappui M/S ten an dawt. Inkhawm zawhah zirlai 400 rualte Kahrawt Field leh a chhehvel tifaiin an hnatlang a; Champhai district chhunga primary school leh middle school zawng zawnga zirlaite an sikul leh an khua
ṭheuhah an hnatlang bawk.

Serchhip district-ah chuan Cleanliness Movement Day hi Chhiahtlangah hman niin, SSA Mission hnuaia sorkar enkawl primary school leh middle school zirlai leh zirtirtute an tel a, faina hnatlang an nei nghal.