Champhaiah chhiah pe tamte chawimawi

Champhaia Taxation department chuan nimin khan Circuit House Conference Hall-ah kum 2015-16 chhunga Champhai district-a chhiah (tax) pe tamte chawimawina hun an hmang a; Champhai DC Vanlalngaihsaka leh Taxation assistant commissioner P Lalrinmawia ten an hmanpui.

Chhiah pe tam chawimawina hun hi Champhaia Taxation superintendent Ngulzaṭhuama'n a kaihruai a; kum 2015-16 chhunga chhiah pe tam mi 10-te hnenah chawimawina hlan a ni. Chhiah pe tam ber chu St. Mary’s Gems neitu Lucas Thangmangliana niin, Rs. 11,11,770 a pe a; ani hi kum thum kal ta chhunga Taxation department kaltlanga bungrua a tihchetnaa sum che vêl chu Rs. 2,35,57,000 a ni.

Chhiah pe tam ber dawttu chu Kim Kim Agency neitu Lalengmawii niin, Rs. 8,87,670 a pe a, pathumna chu A&J Enterprise neitu Jeremy Zoremsanga Tochhawng niin, Rs. 6,82,491 a pe a ni.

Taxation department Champhai Zone hian kum 2015-16 chhung khan sorkarin target a tuk cheng nuai 331.33 chu khûmin, cheng nuai 344.18 an thawk chhuak. Mizoram puma Taxation department target chu cheng nuai 24,455.70 a ni a, cheng nuai 24,976.09 an thawk chhuak a ni.