NITI Aayog-in sorkar laipui scheme-te Hmang tangkai turin Mizoram an duh

NITI Aayog member Prof. Ramesh Chand chuan, Mizoramin sorkar laipuiin scheme leh policy hrang hrang a neihte chhawr
ṭangkai thiam se a duh thu a sawi.

Prof. Ramesh Chand hian Inrinni khan State Guest House-ah thuthar thehdarhtute a kâwm a, "Sorkar laipuiin scheme leh policy ṭha tak tak eng emaw zat a nei a, hengte hi state-te'n an hman ṭangkai thiam a ngai. Mizoram chu lehkhathiam tamna a nih bakah theihna a awm a, hengte hi in hman ṭangkai thiam a pawimawh," a ti.

Mizoramin mau ṭhahnem tak a neihte chu economy lama hmasawnna thlen theih khawp a nih thu sawiin Prof. Ramesh Chand chuan, "Mau hi Mizorama awm a ni a, state dang aṭanga lak luh a ngai lo. Mau hmang hian thil chi hrang hrang siam chhuak turin theihtawp chhuah a ngai," a ti a; mau hman ṭangkai dan tur chu Environment & Forest department hotute nen an sawiho thu a sawi.

NITI Aayog Member chuan, sorkar laipuiin project ṭhenkhata sum an pe chhuak har ṭhin lutuk chu an buaipui tur thu sawiin, "Sum pek chhuah hma a nih theih nan theihtawp kan chhuah ang. Buaina eng emaw vanga sum pek chhuah harte pawh a awm thei a, eng pawh ni se, sorkar laipui thuneitute kan sawipui a ngai," a ti.

Thuthar thehdarhtute'n Mizo-rama tourism project eng emaw zat tihtawp a nih thu an sawi chungchangah Prof. Ramesh Chand chuan, tourism chu a chan ni lo mah se, a theih ang anga a lo bawhzui tur thu a sawi.

NITI Aayog kalphung sawifiahin Ramesh Chand chuan, "NITI Aayog chu Planning Commission anga sum pe chhuaktu a ni ve lo. State-te'n eng nge theihna an neih, eng nge kalpui se ṭha ang tihte kan endik a, thurâwn kan pe ṭhin a, a ṭul dan azirin pilot project-te kan kalpui ṭhin. State-te nen thil sawihoin technical lamahte a ṭul angin kan pui dawn a ni. Hmasawnna hi pawisa ringawt a ni lo," a ti.

Prof. Ramesh Chand chuan, state puih ngai deuha ngaihte an tlawh chhuah mek thu sawiin, "Kan thil hmuh leh hriatte ministry hrang hrang kan sawipui dawn. Sum pe chhuaktu ni lo mah ila, ministry hrang hrang aṭanga an sum dawnah state-in sawisel an neih chuan NITI Aayog hian kan pui ve thei a ni," a ti a; NITI Aayog chuan state-te'n hma an sawnna atan theihtawp an chhuah tur thu a sawi.

NITI Aayog Member ṭawi-awmtu DoNER Minister adviser Dr JP Mishra chuan, agriculture leh environment & forest lama Mizoram hmalakna chu ṭha tâwk loa a hriat thu a sawi a, "An thil thar chhuah leh siam chhuah aṭanga chhûtin, state dang nen khaikhinin Mizoram hi a ti ṭha tawk lo. Scheme hrang hrang ṭha taka tih erawh eng emaw zat an nei," a ti.

Prof. Ramesh Chand hian Zirtawpni zan khan chief minister Lal Thanhawla a banglaah kâwmin, thil pawimawh hrang hrang a sawipui. Chief Minister chuan, NITI Aayog hnathawh leh kalphung state sorkarin a la hriat chian tâwk loh thu sawin, beiseina sang tak erawh a neih thu a lo hrilh a ni.