Damdawi-in leh sub-centre-te Rúl túr thahna kawl turin hriattir

Health minister Lal Thanzara chuan, Health department pahnih - Health Services leh Hospital & Medical Education department hotute chu damdawi-in leh sub-centre hrang hrangah rúl túr thahna an kawl reng theih nana ṭan la turin a hriattir.

Mizoram hmun hrang hrangah rûl chuk vangin thihna a thleng zauh zauh a; tun hnaia Aizawla rûl chuk vanga thihna thleng chu pawi a tih thu leh, Aizawl Civil Hospital-a damdawi khaihlak lâi tak a nih thu Lal Thanzara chuan Vanglaini palai a hrilh.

Tun hnaiah rûl chukin Aizawl Civil Hospital (ACH) an pan a, ACH-in rûl tûr thahna (anti venom) an lo neih loh avangin, Health Minister chuan sorkar damdawi-inte'n rûl tur thahna nghei loa an neih reng theih nan hma a la nghal tih a sawi a; tun hnaia Aizawla rûl chuk vanga thihna thleng a hriat veleh ACH medical superitendent Dr Rosangluaia chu thil awmzia a zawh nghal thu leh anti venom chu nei reng tawh tura a hriattir nghal thu a sawi a ni.

Rûl chuk vanga ACH pantute'n hmun dang an pan a ngai chu damdawi khaihlak vang a nih thu sawiin, Lal Thanzara chuan, "Anti venom hi Rojani Kalyan Samiti (RKS) suma lei ṭhin niin, lei tura an tihfel vek tawh a ni a, ACH-ah hian an neih loh lai tak leh lei tura an inbuatsaih lai, a khaihlak lai tak a nih avangin a lo awm lo a, a pawi hle a ni," a ti. RKS-ah hian Aizawl DC chu chairman a ni a, member-ah MLA pahnih bakah member dang mi 20 an awm ṭhin.

Health Minister chuan, tunlai hi rûl an inlàr tam hun lai a nih avangin thingtlang hmun hrang hrangah rûl chuk damdawi dah turin Health department hotute a hriattir tih sawiin, "Health sub-centre tina dah a nih theih nan hma an la nghal ang," a ti a; anti venom bakah, rannung seh damdawi pawh kawl reng turin ACH hotute a hriattir tih a sawi.

Thu dawnnain a sawi danin, rúl túr thahna (anti venom) hi Rs. 600 man vel a ni.