Minority Affairs Secretary-in Larsap leh offcial-te a kâwm

Ministry of Minority Affairs secretary, Rakesh Garg chuan April 22, 2016 khan State Guest House-ah sorkar offcial-te a kâwm a, tlaiah Raj Bhavan-ah Lt.Gen. Nirbhay Sharma a kâwm bawk.

Rakesh Garg chuan, Ministry of Minority Affairs hnuaiah mipuite tan hamṭhatna hmuh tur tam tak a awm tih sawiin, "Chung zinga ṭhenkhat Mizoram sorkarin hai chhuakin, hmang ṭangkai mek mah se, an la hmelhriat loh scheme eng emaw zat a awm a, sakhua leh hnam tlem zawkte châwi kân nan sawrkar laipuiin scheme a siamte chhawr ṭangkai lehzual turin official-te'n theihtawp an chhuah a ṭul," a ti.

Union Secretary ho hian Minority Affairs hnuaia scheme khawihtu department-te bakah, Aizawl, Lawngtlai leh Mamit DC-te'n Prime Minister’s New 15 Point Programme, Multi Sectoral Development Project (MSDP) leh scheme dangte kaltlanga Mizoram chhunga hmalakna hrang hrang an sawiho a ni.

Rakesh Garg hian Larsap nen an inkawmnaah, Minority Affairs hnuaia zirlaite pual bika scheme hrang hrang a kalpui mekte a sawifiah a, Mizoramin a dawn tur leh a dawn theih tam zawkte Minority Affairs hnuaiah hai chhuahtur a neihte a hrilh.

Minority Affairs Secretary chuan, Mizoram zirlaite'n Minority Affairs hnuaia scholarship an dawn theihte hriat chian tum se a duh thu sawiin, "Central service, all India services examination ziah tumte coaching kalna senso leh professional course zirlaite tan pawh an zirna senso tam tham tak tihziaawmna atan ministry-in a tumsak thei," a ti.

Mizoram zirlaite'n online hmanga scholarship form an fill-up chungchanga harsatna an tawhte a hriatthiampui tih sawiin, Rakesh Garg chuan, "Online system hi thil thar a nih a vangin keimahni lam pawhin harsatna kan tâwk," a ti a; chiang zawka siam a nih theihna atan hmalakpuiah Larsap a sâwm a ni.