KHAWTHLIR

Thisen pe

Mizoram University Christian Fellowship chuan an kum 10 tlin lawm nan Inrinni khan blood donation camp an huaihawt a; Synod Hospital tan mipa 25 leh hmeichhia pangate'n thisen unit 30 an pe.

Home tanpui

Lawngtlai khawpuia auto-rickshaw neitute leh khalhtute chuan an pawl din champha lawm nan Inrinni zing dar 6 aṭanga chawhnu dar 2 thlenga an service-na aṭanga an sum hmuhte chu thawh khawmin, Lairam Motherless Home leh Lawngtlaia damdawi-in pathuma mi harsa zualte ṭanpui nan an pe. Lawngtlaiah hian auto-rickshaw 250 vel a awm a, Inrinnia an sum hmuh zawng zawng chu Rs. 35,802 a ni.

Tuizem hawng

Department of Science & Technology bultuma siam, Hmunpui khuaa ruahtui khawlna tuizem 12 chu Inrinni khan minister John Rotluangliana'n a hawng. Tuizemte hi Science & Technology hnuai-ah Mizoram Science, Technology and Innovation Council (MISTIC), Directorate of Science & Technology-te'n a siam hna an thawk .

Exhibition tlawh

Governor Lt.Gen. Nirbhay Sharma chuan Inrinni khan Millennium Centre ground floor-a ASEP buatsaih, sava thlalak târ chhuahna exhibition a tlawh. Larsap chuan, ramngaw leh nungchate humhalh kawnga hmalakna awmte chu mipui zawng zawngin thlawp se a duh thu a sawi.

Túr in vangin thi

V Lalsangmawia s/o Lawrkhuma (L) ,Kolasib Project Veng chu nimin chawhma dar 11:40 vel khan túr a in avangin a thi. Thu dawn danin, V Lalsangmawia hian rannung thahna hlo chu pum damdawi emaw tiin Inrinni chawhnu khan a in a, Inrinni zan dar 11 velah damdawi-in panpui ni mah se, doctor-te'n an chhan thei ta lo a ni. V Lalsangmawia hi V/C president ni lai a ni.

Inkhawmpui tiak

Presbyterian Kohhran Mizoram Synod hnuaia pastor bial hrang hrangte'n April 22, 2016 aṭanga bial inkhawmpui an hman chu nizan khan a ṭiak. Bial inkhawmpuiah hian nimin Inrinni khan rorel inkhawm neih a ni a, bial hrang hrangte chuan an bial chhung thil leh Mizoram huap thilte an ngaihtuah a ni.