Thli leh rialin Champhai dist-ah in a tichhia

April 23, 2016 zing khawvar hma, dar 2-4 inkar khan Champhai district-ah thlipui a tleh bakah, nasa takin rial a tla a; khaw hrang hrangah chhungkaw 140 vel chenna in a chhia.

Thu dawn danin, Inrinni zinga thli leh rial thawk vang hian hriat theih chinah North Diltlang khuaah in 40 vel chung rangva a chhia a; Kawlkulh Chhimvengah in 100 vel, Champhai Vengsangah in pathum, Champhai Kahrawtah in pahnih leh Champhai Vengthlangah in pathum chung a chhia. Thliin Vapar High School chung rangva a lên chhe bawk.

Tun hnaia khuarel chhiatna tuartu chhungkuate'n an in an thawm ṭhat nan parliamentary secretary TT Zothansanga hmalaknain rangva bundle 680 pek an ni.

April 22, Zirtawpni zana thli tlehin New Champhaiah chenna in pasarih leh leilet záwla thlám pakhat a nuai chhia a, chung zinga pahnih chu luah zui tlak lohin a chhia. Electric ban pali a tluk bakah, Zomi Baptist biak-in a tichhe nual. Tlangsamah pawh chenna in pakhat a nuai chhe bawk.

Chenna in chhiate chu Inrinni khan khawtlangin hnatlangin an thawm ṭha a, bialtu MLA JH Roṭhuama chuan hnatlang thingpui inna senso atan Rs. 3,000 a pek bakah, silpauline eng emaw zat a pe a ni.