MZP-in CAU thil tih dan an duh lo

MZP chuan thuchhuah siamin, April 22, 2016 khan College of Veterinary Sciences & Animal Husbandary (CVSAH), Selesiha hna lak chungchanga thil dik tâwk lo awmte zir chiangin a hmunah an kal tih an tarlang a, "Dean D Kathahiresan chu a office-ah thil awmzia sawipui a ni a, Vice Chancellor hnenah lehkha thehluh a ni," an ti.

MZP chuan, CVSAH-a thawk tur lak danah thil fel lo leh thuneitute'n ram leilung fate aia an hnampuite duhsakna hleihluak a awm ngeia an hriat thu sawiin, "He thil hi kan duh lo a, ṭha kan ti lo hle," an ti a; tling leh tlak an awm chuan ram leilung fate ngei la ṭhin turin CVSAH thuneitute an ngen.

MZP tarlan danin, Central Agriculture University (CAU), Mizoram hnuaia CVSAH-a thawk tur medical assistant post pahnih hnawhkhah turin kum 2012-ah advertisement chhuah a ni a, tun thlengin lak an la ni lo. Kum 2011-a CAU, Imphal-a thawk tura an lak mi pahnih - Khondram Shantibala leh Ningthoujam Bheugyabati-te chu Mizorama thawk zawk tura tih an ni.

CAU Vice Chancellor-in medical assistant pahnih Mizorama thawk tura a tihna thupek chu sût turin an ngen a; mi pahnihte pawh Mizorama joinning report pe lo turin an ngen bawk.