MHRD-in Lungleiah MZU din a phal A hmunhma a awm thei ang - HTE Minister

Mizoram University (MZU) southern campus, Lungleia din phalna chu tun hnai khan Ministry of Human Resource Development (MHRD)-in a ti chhuak. Higher & Technical Education (HTE) minister Dr R Lalthangliana chuan MZU southern campus hmunhma tur a awm theih tur thu a sawi.

MHRD chuan MZU Vice Chancellor hnenah lehkha ­thawnin, Lungleia MZU Southern Campus din rem tih a nih thu hi a hrilh a, he lehkha hi MHRD chuan Delhi Mizoram House-a a awm laiin Dr R Lalthangliana hnenah an pe a ni. Lehkhaah hian MZU southern campus hi a thuphunga din phal a nih thu tarlan a ni.

Lehkhaa tarlan a nih dan chuan campus dinna atan hian a dinna tur ram chu Mizoram sorkarin a thlawna a pek a ni dawn a, campus thar cheibawl hna chu Higher Education Financing Agency (HEFA) sum hmanga thawh tura ruahman a ni. MZU southern campus din phalna hi HTE minister Dr R Lalthangliana'n October, 2019-a DO letter a thawn leh MZU Vice Chancellor-in December, 2019-a lehkha a thawnte bawhzuia tih chhuah a ni. Lungleiah southern campus dinna tur ram ruak a awm ngei a ni tih finfiah phawt turin MZU Vice Chancellor chu hriattir a ni.

Thuthar thehdarhtute zawhna chhangin HTE minister Dr R Lalthangliana chuan MZU southern campus dinna atan hian ram a awm theih dawn thu sawiin, "Khaw chhung hmun lun laia awm chi a ni loa, khaw pawn deuh hleka awm ngai a ni. Kan sorkar leh hnua Delhi ka kal hmasak bera MHRD Minister ka sawipui nghal a, hetianga a hlawhtlinna kan hmu hi ka lawm takzet," a ti.

HTE Minister chuan class ṭan thuai a nih theihna atan Pukpuia engineering college tura sak chu luah laikawl a rilruah a awm thu sawiin, "Mah se, thutlukna engmah siam a la ni lo. Class ṭan theih vat nise kan duh," a ti a, engineering college tura sak chu a zauh avangin MZU-in lo luah lailawk ve dawn pawh nise harsatna a awm loh tur thu a sawi.

MZU southern campus chung­changah hian Mizoram sorkarin a duh duha thil a tih theih loh thu sawiin Dr R Lalthangliana chuan, "Lehkha pawh MZU Vice Chancellor hminga lokal daih a ni. Remchang hmasa berah chhim lam MLA-te, MZU Vice Chancellor, Registrar leh HTE dept. official-te MZU southern campus chungchang hi ka sawipui ang," a ti.

Dr R Lalthangliana chuan MZU southern campus-ah chuan tuna MZU syllabus awm mek ni lo, a dang deuhte awm thei se tia rawtna MHRD-ah a siam thu sawiin, "Syllabus ngai pat pat ni lo, kan ṭhalaite'n syllabus dang deuh, hna an hmuh theihna tur si awm thei se ka duh thu ka thlen a ni," a ti a, a rawtna hi MHRD lam pawhin ṭha an tia a hriat thu a sawi.