Kawng zauh tura harsatna chinfel phût; Lok Sabha inthlan boycott an tum

Kolasib District Land Owners' Associa­tion (KDLOA) chuan nimin khan Aizawl Press Club-ah thuthar thehdarhtute an kâwm a; National Highway, Vairengte leh Sairang inkar kawng zauh tura harsat­na awmte April 15, 2024 hmaa chinfel a nih loh chuan Lok Sabha inthlan boycott an tum thu an puang.

KDLOA hruaitute chuan Vairengte-Sairang inkar kawngpui thlúr li (four lane)-a laih turah kum 2019 khan an ram lâk a nih tawh thu sawiin, "Vairengte-Sairang inkar kawng hi package riatah ṭhen a ni a, package 7-8 hi a la fel lo. A bak zawng Vairengte-Kawnpui thleng hna ṭan theih a ni tawh. Mahse, ram neitute'n zangnadawmna kan dawng lo. Kum 2021 kum tàwp lamah Forest department rawn lang ṭanin, harsatna an siam a ni," an ti.

EFCC department-in kawng aṭanga a lehlam lehlam metre 500 chin chu forest reserve atan an puan thu an tarlang tih sawiin KDLOA chuan, "Gauhati High Court, Aizawl Bench-ah Single Bench-in a ngaihtuah a, forest reserved atana puan a nihna a hnâwl. A hnuah pawl pakhatin court thutlukna khing lêtin, Principal Bench-in a ngaihtuah leh a, a khingtute an inhnûkdâwk," an ti a; Principal Bench pawhin Single Bench thutlukna a pawmpui thu an sawi.

KDLOA hruaitute chuan, sorkar liam ta leh sorkar lai mekin Cabinet Meeting-ah court thutlukna a zahawm avangin EFCC department-in an pawm turin thutlukna an siam tih sawiin, "Mahse, Forest department hian an pawm duh tlat lo. Pawm duh se chuan buaina a tàwp ang. Sorkar committee sang Empowerment Committee pawhin Forest department-in harsatna awm chingfelin, thing kih phalna ti chhuak rawh se, an ti a, mahse, Forest dept.-in an tichhuak duh chuang lo," an ti.

Ram lâk turin tu mah an ngen loh thu sawiin KDLOA hruaitute chuan, "Loh theih lohin sorkarin a la a, kan ui khawp mai. Kan huan thlaite hi hun rei tak chhung kan eizawnna a ni. Kum thum kal ta aṭang khan khawih chêt min phalsak tawh lo," an ti a; EFCC department-in harsatna an chingfel duh miah lo chu hriatthiam harsa an tih thu an sawi.

KDLOA hruaitute chuan, tun hnaiah Kolasib district chhung khaw hrang hranga ram neitute an inhmuh khawm thu sawiin, "Kan sorkar leh an hnuaia Forest department hian harsatna awm min chinfelsak rawh se. April 15, 2024 thleng kan nghak ang a, min chinfelsak loh chuan Lok Sabha inthlan tur hi ram neitute leh chhungkhat laina zawng zawngin boycott ni rawh se, tiin kan rel," an ti.

KDLOA hruaitute sawi danin, ram neitu chu chhungkaw 1,700 chuang an ni.