Mizoram House chungchangah a ṭul chuan Supreme Court thlengin kan kal ang - CM

Chief minister Lalduhoma chuan, Ballygunge, Kolkata-a Mizoram House hmun/ram nei lêt leh turin a ṭul chuan Supreme Court thlenga an kal tur thu leh Calcutta High Court thutlukna chu an khin lêt dawn thu Vanglaini palai a hrilh.

Zawhna chhangin Chief Minister chuan, Ballygunge, Kolkata-a Mizoram House hmun chungchanga Calcutta High Court thutlukna chu an khin lêt dawn thu a sawi a, "Thla khat chhung hun pek kan ni a, hun kan la nei. Thil buaipui ngaite kan buaipui mek a, kan peih ṭêp tawh. Kan peihfel velah kan khing lêt ang," a ti.

Chief Minister sawi danin, Calcutta High Court thutlukna chu Calcutta High Court-ah vêk khin lêt phawt a ni dawn a, a ṭul chuan Supreme Court thlenga kal an tum.

Tarlan tawh angin, MNF kaihhruai Mizoram sorkar chuan Ballygunge, Kolkata-a Mizoram House hmun chu a hralh a, chu chu ZPM kaihhruai sorkar tharin a sût a, chu chu Calcutta High Court-in April 2, 2024 khan a sût ve leh a ni.

Ballygunge-a Mizoram House hmun hi Mizoram sorkar chuan kum 2023 khan Excel Vincom Pvt Ltd hnenah a hralh a, a man pawh Mizoram sorkarin a dawng tawh. Mahse, ram hralh danah thil fel tâwk lo leh mimal hamṭhatna tur thil a awm nia ngaiin ZPM sorkar a pian hnuah mipui tam zawk duh dan angin kumin 2024 khan Mizoram House hmun hralh tawh chu sût a ni.

Excel Vincom Pvt Ltd hi Calcutta High Court-ah an zualko a, High Court chuan hun eng emaw chen a ngaihtuah hnuah Mizoram House hmun hralh tawh sût a nihna chu a ṭhiat ve leh a ni.