MLA TBC-a'n dan anga hmalak a tum

All Mizoram Car Rental Association (AMCRA)-in Lok Sabha inthlana official-te chuanna atana rental car hman kaihhnawiha MLA TBC Lalvenchhunga bâng tura an phût chungchangah TBC Lalvenchhunga chuan, thu dik lo hmanga intihhmingchhiatna a ni, tiin dan anga hmalak a tum a, a hmanhmawh rih lo thung.

Vanglaini palai zawhna chhangin TBC Lalvenchhunga chuan, an hmalak dan turah an fimkhur thu a sawi a, "Kan fimkhur viau a, a tàwp thleng law law turin kan inbuatsaih. Kan hmanhmawh vut vut lo a, dan anga hma la turin kan inbuatsaih mek," a ti.

AMCRA, TBC Car Rental leh TBC Lalvenchhunga chungchang hi adviser to chief minister Lalmuanpuia Punte pawhin nimina ZPM party pisaa inkhawmah a sawi a, "Pu TBC Lalvenchhunga dâwt ngialngan hmanga an puh hi a thinrimthlak hle. Hetiang dâwt hmanga inpuhna leh intihhmingchhiatna hi a chhàn lêtna kan hmu thuai dawn," a ti a, a tàwp thlen an tum thu a sawi.

Lalmuanpuia Punte chuan, "TBC Car Rental chungchangah kan MLA hian inrawlhna pakhatmah a nei lo a, a hriatpui hek lo... A tàwp thlen kan tum a, an phû tâwk hremna an hmu ngei turah kan ngai. Court-in a chingfel thuai dawn a ni," a ti bawk.

Tarlan tawh angin, April 4, 2024-a Hotel Regency-a AMCRA inkhawmpui chuan resolution an siam a; Lok Sabha inthlana election official duty-te tana car hmang turin AMCRA kaltlangin hman a nih loh thu te, AMCRA member ni lo TBC Car Rental-te chauh koh an nih thu te, TBC Car Rental neitu TBC Lalṭhatluanga chu adviser to CM TBC Lalvenchhunga unaupa a nih thu te, TBC Lalvenchhunga chu a thuneihna dik lo taka hmangah an ngaih thu te, chumi avang chuan MLA aṭanga báng tura an phût thute an tarlang a ni.

TBC Lalvenchhunga pawhin April 4 vêk khan statement a tichhuak a, "AMCRA-in MP (Lok Sabha) inthlana election official duty-te tana car rental hman a nih chungchangah thuneihna dik lo taka hmang leh mimal hamṭhatna atana hmang anga min puhna hi ngawihbopui chi niin ka hre lo a... Dik lo taka inpuhna leh intih­hming­chhiatna chung­changah hian dan hmanga hmalak a ni ang," tiin a tarlang.

TBC Car Rental pawhin April 5, 2024 khan thuchhuah siamin, election official zawng zawng lirthei an pe vek anga AMCRA-in an sawi chu thu dik lo a nih thu an tarlang a, "Tun ṭum MP election-ah hian observer pali chauh an awm a, liasion officer motor-te nen motor pariat bakah, Income Tax lamah motor pathum, a vaiin motor 11 kan duty mek," an ti.

TBC Car Rental chuan, Lok Sabha inthlana official pawimawhte tana lirthei hman tur an hnen aṭanga lak chungchangah MLA TBC Lalvenchhunga'n inrawlhna a neih loh thu sawiin, "Observer-te motor kan pe tih pawh a hre lo," an ti. TBC Car Rental chu kum 2014-a licence nei leh licence pek hmasak ber an nih thu te, AMCRA dintu zinga mi an nih thu te, an thil tih dan avanga tel zelna tlâka ngai loa an chhuahsan tak thu te, TBC Lalvenchhunga leh sorkar officer Florence Lalrinpuii thu dik lo hmanga an tihhminghliau avangin ngaihdam dil tura AMCRA an phût thute an tarlang bawk.