LADC MNF MDC pasarihte'n MNF ṭanga bànna an thehlut

Lai Autonomous District Council (LADC)-a MNF party aṭanga member of district council (MDC) pasarih chuan nimin khan MNF party aṭanga bànna an thehlut.

Bànna thehluttute chu - Manghmunga Chinzah, T Lalengmuana, V Zathanga, BN Thangpuia, Tuturu Singh, L Lalhmachhuana leh CL Lianzuala te an ni a; MNF primary member an nihna leh MNF District Headquarters, Lawngtlaia adviser an nihna aṭanga an bàn thu, MNF Lawngtlai District President hnenah an thehlut a ni.

LADC-ah hian inthlan hnuhnung bera chak chu MNF party an ni a, chief executive member (CEM) V Zirsanga chu eirûk thubuaiah court-in thiam loh a chantir avangin MNF Legislature Party-ah buaina a awm zui a ni.

MNF MDC ṭhenkhatte leh BJP, INC, ZPM leh independent MDC-te, an vaiin MDC 13 chuan CEM V Zirsanga'n sorkar siam turin thláwptu a ngah tâwk lo tiin Governor-ah an thlen a; chuvang chuan V Zirsanga kaihhruai sorkar chu bûk (floor test) tum a ni a, mahse, bûk a nih hmain V Zirsanga chu CEM aṭangin a báng a ni.

LADC-a MDC thlan tlin (elected member) awm zat chu 25 a ni a, mahse, thlan tlin zinga mi Dr Lorrain Lalpekliana Chinzah chu MLA atan thlan tlin a nih avangin MDC aṭangin a báng tawh a, MDC 24 an awm mek.

LADC-ah CEM-in thláwptu a ngah tâwk lo tia Governor hnena thu thlentute zinga MDC pakhat chu lehlam pawlah a pakai leh a, lehlam lehlamah MDC 12 ve ve an awm avangin LADC-ah sorkar siam thei an awm lo. Hei vang hian Governor chuan LADC thuneihna chhuhsakin, Lawngtlai DC chu LADC enkawl turin a ruat ta a ni.