RM Chakma-a'n hun tawpah insawifiahna thawn a tum

Tuichawng bialtu MLA Rasik Mohan Chakma chuan Assembly speaker Lalbiakzama'n MLA aṭanga bàn a nih loh chhan tur sawifiah tura a hriattirna chu a la chháng lo a, hun tiam a tàwp ní-ah insawi­fiahna thawn a tum.

Assembly Speaker hian March 23, 2024 khan RM Chakma hi CADC chief executive member leh MLA a nih kawp avangin The Mizoram State Legislature Members (Removal of Disqua­lification) (Amend­ment) Act, 2006 hmanga MLA aṭanga bàn a nih loh chhan tur April 15, 2024 hmaa sawifiah turin a hriattir a ni.

Vanglaini palai zawhna chhangin RM Chakma chuan, insawifiahna a la thawn loh thu a sawi a, "Hun a la awm tho a, April 15-ah chiah chiah ka insawifiahna ka thawn ang," a ti.

RM Chakma hian CADC CEM leh MLA a nih kawp avangin dan a bawh­chhiat loh thu leh, dan bawhchhiatna ni se a nih kawp loh tur thu Vanglaini a lo hrilh tawh a ni.