Kum 85 chung lamte leh rualbanlote an in lamah vote thlâktir mek a ni

Lok Sabha inthlanpui atan nimin khan district ṭhenkhatah ballot paper hmangin home voting kalpui ṭan a ni a; rualbanlo te, kum 85 chung lamte leh mipui mamawh buaipuitute vote thlaktir an ni.

Aizawl district-ah chuan Assembly bial 12-ah rualbanlote leh kum 85 chung lam, vote thlâk tura polling station pan harsatte tan in lama vote thlâk (home voting) kalpui ṭan a ni a, April 10, 2024 thleng kalpui a ni dawn. Aizawl district-ah hian home voting atan mi 874 chhinchhiah a ni a, chu'ngte chu rualbanlo mi 54 leh kum 85 chung lam mi 840 an ni.

Siaha district-a essential service voter mi 14-te chuan nimin khan Siaha DC pisaah postal ballot hmangin vote an thlak a, sorkar department pathum - Prison, Heath department leh Power & Electricity department mi leh sate an ni.

Siaha district-ah hian home voting pawh kalpui mek a ni a, Saiha bialah polling official team pariat leh Palak bialah team 10 tirh chhuah niin, vote thlaktir tur kum 85 chung lam mi 137 leh rualbanlo mi 40 an awm.

Lawngtlai district-a kum 85 chung lam leh PwD-te tan pawh nimin khan home voting kalpui ṭan a ni a, April 13, 2024 thleng kalpui a ni ang. Tuichawng bialah kum 85 chung lam mi 23, Lawngtlai West bialah kum 85 chung lam mi 22 leh, Lawngtlai East bialah kum 85 chung lam mi 95 leh rualbanlo pali an awm a, home voting ti turte hi an vaiin mi 144 an ni.

Nimin vêk khan Lawngtlai district-a essential service duty mi 26-te tan DC Conference Hall, Sangau BDO Office leh Chawngte SDO (C) pisaah vote thlak hun hawn ṭan a ni bawk.

Khawzawl district-a Tuichang biala kum 85 chung lam leh rualbanlo mi 109-te chu nimin khan an inah vote thlaktir ṭan a ni a, home voting team parukin buaipuiin, vawiinah vote thlak zawhtir hman beisei a ni.

Nimin vêk khan Khawzawl DC auditorium-ah essential service duty tur mi parukte'n postal ballot hmangin vote an thlak bawk.