State sorkar lai thawhpui thei tur mi an pawimawh - Muanpuia Punte

Lalmuanpuia Punte, adviser to chief minister chuan nimin khan ZPM pisaa inkhawmah thu sawiin, Mizorama Lok Sabha inthlan turah MP turin mi lâr leh thusawi thiam aiin, state-a sorkar lai thawhpui thei tur mi an pawimawh zawk thu a sawi.

Lalmuanpuia Punte chuan, Lok Sabha inthlan a nei tih sawiin, "Opposition ṭangrualin tun hnaiah sorkar lai an hneh ngai lo a, chuvangin, ZPM tan lungngaihna tur a awm lo. MP turin mi lâr leh thusawi thiam aiin, state-a sorkar lai thawhpui thei tur mi an pawimawh zawk," a ti.

An thusawite a eng emaw lai tê la chhuakin inbeihna atan hman a ni fo tih sawiin Muanpuia Punte chuan, "Mipuite'n an hriat chian hnuah a vawtuin êk a cheh tih ang mai a ni leh ṭhin. BJP thlahlel ngawih ngawihte'n keini NDA-ah kan ṭhu dawn lo tih chiang taka sawitu thawhpui tum anga min sawi fo hi a hre chiang apiang nuih a za mai a ni," a ti a; Pathianin ZPM a hruai dan chu mak a tih thu a sawi.

Lalmuanpuia Punte chuan, Zo hnahthlak raltlante ṭanpuina kawngah Mizo mipui an insan mar thar leh a ngaih thu sawiin, "Kan mi leh sate dinhmun hi a harsa tak zet a, Mizo mipui hian kan thlahthlam thiang loin ka hria," a ti.

Autonomous district council chungchangah sorkar kal tawhte an inrawlh nasa ṭhin tih sawiin Muanpuia chuan, "Keini erawh chuan kan party ni lo mah se, pheh thlûk tumin kan veh kan veh ve dawn lo tih Chief Minister-in a sawi tawh. Chakma Autonomous District Council-in harsatna an tâwk a, ZPM-a rawn luh tum mah se, a changtu District Council Affairs Minister chuan an ZPM tak tak a rin loh avangin ZPM-a inpek a rem loh thu a hrilh hial a ni," a ti bawk.