Mizoram sorkar leh sorkar laipui inkara leilâwnah ka ṭang dawn - ZPM Candidate

Lok Sabha inthlan tura ZPM party candidate Richard Vanlalhmangaiha chuan, MP atan thlan tlin a nih chuan Mizoram sorkar leh sorkar laipui inkara indawrnaah leilâwnah a ṭan dawn thu leh, kut hnathawktute hmasawnna a ngaih pawimawh dawn thu a sawi.

Richard Vanlalhmangaiha hian nimin khan Ngopa khuaa vantlang inkhawmah thu sawiin, "MP atana thlan tlin ka nih chuan ramin hmasawnna rotling a neih theihna turin theihtawp ka chhuah dawn a, Mizoram sorkar leh sorkar laipui inkara indawrnaah leilâwnah ka ṭang dawn. Mizoram chhung leh páwn lam tan a ṭangkai thei ang bera hna thawk turin ka pên chhuak dawn a ni," a ti.

ZPM sorkar tharah kut hnathawktute chawikân nan nasa taka hma lak a nih dawn thu sawiin Richard-a chuan, "Tunlai thiamna leh khawl changkang zawk hmangin loneitute tana awlsam leh hlawk zawka thlai thar sawngbawl dante pawh ngaihtuah a ni zel dawn. Chumi atan chuan sorkar laipui hnuaia kut hnathawktute tana hamṭhatna awmte tun aia nasa zawka hai chhuah kan tum dawn a ni," a ti a; kut hnathawktute a ngaih pawimawh thu a sawi.

Lengteng bialtu MLA F Rodingliana pawhin thu sawiin, hmasawnnaa intlansiaknaah kawlphetha neih ṭhat a ngaih thu a sawi a, "Chumi tur chuan central lama kan project lo ûm zui turin state sorkar thawhpui thei tur MP kan neih a ngai a ni," a ti.

F Rodingliana chuan, "Sorkar kalta khan Mizoram hi ICU-ah a dah a ni ber a, a bikin Health leh Education department kha SEDP ventilator ringin an thaw ṭâwk ṭâwk a ni. Power bill bá vbc. 120 chuang min hnutchhiah a, tunah hian theihtawp chhuahin hma kan han la a, tlem chuan phurrit a ziaawm ṭan mek a ni," a ti bawk.