Hackventure 2.0 huaihawt a ni

Mizoram Police leh National Institute of Technology, Mizoram chuan nimin khan Police Headquarters-ah national level hackathon event 'Hackventure 2.0' an huaihawt a, DGP Anil Shukla-a'n a hawng.

Anil Shukla chuan, hackathon chu police leh mipui inkara inkungkaihna ṭha zawk siamna tur a nih thu sawiin, "Tunlai thiamna thar ber ber hmanga kawng hrang hranga police hna puih theihna tura ṭhalai ho thiamna, finna leh hriatna sâwr chhuaha hman chhuah theihna tura buatsaih a ni," a ti.

DGP chuan, police hnaah chuan data kaihhnawih thil a tam avangin database mumal leh ṭha zawk neih nan leh, sualna tam zawk pumpelh a nih theih nan Hackventure 2.0 kaltlangin ṭangkai zawka technology hman dan duan chhuah a nih ngei a beisei thu a sawi bawk.

Inkhawm hi IGP (Hqrs) Neihchungnunga'n a kaihruai a; NIT, Mizoram director Prof. S Sundar pawhin thu sawiin, Mizoram Police nen technology lama hmasawnna atan thawhho an phùr thu a sawi.

Hackventure 2.0 hi April 10, 2024 thleng neih tur a ni a; online quiz on cyber security, talk on emerging cyber security scenario by expert from I4C (MHA), development of IT solution for the following 4 pre identified problem statements, idea pitching contest–te neih tura ruahman a ni.

Hackathon tum ber chu information technology lama Mizoram Police mamawh tur duan chhuah a ni a; intihsiakna hian police tana ṭangkai tur IT lama ruahmanna mai bakah, idea hrang hrang tuaihnûma hman tak tak theih tura chher chhuah a ni.