Chhiatna thleng thei laka fimkhurna tur tichhuak

Lawngtlai District Disaster Management Authority chuan fûr a hnaih tawh avangin Lawngtlai district mipui ngenna leh hriattirna an tichhuak a; mahni chenna in bula tuihâwk luankawrte tui a luan ṭhat theih nan lo tifai lâwk turin an ngen.

LDDMA chuan, "Lawngtlai district hi thli leh ruahtui tamna a nih ṭhin avangin fûr lo thleng tur atan hian theihtawpa lo inpuahchah lâwk turin mipui kan inngen. Engtik lai pawha khuarel chhiatna thleng thei reng dinhmuna kan din avangin chî-âi lo a, chhiatna thleng thei laka inveng turin kan inhriattir e," an ti.

MIPUI HRIAT TUR

☑ Mahni chenna in bula kawr/side drain-te tui a luan ṭhat theih nan theih ang anga lo then fai lâwk tur.

☑ In leh a velte uluk taka thlithlaiin, tukverh leh kawng­kharte nghet taka kalh theiha siam tur.

☑ Thli tleh laia chhuah ngai lo tura mamawh hrang hrang lak khâwl lâwk ni se.

☑ Chenna in bulah thingṭang ro tla mai thei a awm chuan thenfai bakah, thli tlehin a chhem lèn theih ang chite nghet taka ṭâwn/kilh beh tur.

☑ Damdawi (first-aid) mamawh tur ang chite kawl lâwk tur a ni.

☑ TV leh khawtlang aurinnaa thu puante ngun taka nghaihven ṭhin tur.

☑ Thlipui tleh laiin electric switch off vek tur a ni.

☑ Thlipui tleh theih hun chhung leh ruahtui tam laiin ram leh luiah kal loh hram tur.

☑ Loh theih lohna vanga khualzinte chu kawng laka chhiatna thleng thei thilah ei leh in leh damdawi (first-aid) inrin lâwk tur.

☑ Titi lêngvâk vel mai maiah innghat loin, sorkar thuchhuak ngaihchan tur a ni.