BJP hi Mizoram chhim lam mipui tan innghahna tlak a ni - BJP Candidate

Lok Sabha inthlan tura BJP candidate Vanlalhmuaka chuan nimin khan Siahaa vantlang inkhawmah thu a sawi a; BJP chu Mizoram chhim lam mipui tan innghahna tlak a nia sawiin, amah vote turin Mara mipui a ngen.

Vanlalhmuaka chuan, MNF candidate chungchang sawiin, "MNF candidate Pu Vena chuan NDA zawm a, a chhung aṭanga BJP beih kan tum, a ti. Mizorama MP pakhatin a chhung aṭangin ka bei ang a tih hi chu mi â niléng lo chuan a mâwlthlakzia an hrethiam ang. MP 500 chuang neihna India rama MP pakhat neiin a chhung aṭanga beih a tum thu a sawi hi central BJP hian an kuta tho fù ai pawhin an ngai pawimawh lo zawk ang," a ti.

ZPM-in kalphung thar an tih chu kalpui a nih theih nan central-a sorkar leh tur BJP candidate vote a ṭul nia sawiin Vanlalhmuaka chuan, "BJP candidate kan thlang tling a nih chuan kalphung thar dik tak zawk chu kan hmu thei tawh ang," a ti a; central sorkar aṭangin hmasawnna chak zawk a awm theih thu a sawi.

BJP candidate chuan Congress party chungchang sawiin, "Congress party chu 'Khawvel ral hun atan an dah ta' tih ang hi an ni tawh. An sorkar laiin Mizoramah bomb an thlâk a, kan hmeichhiate min pawngsualsak. Kha aia kam ram, kan hnam chhiatna kha a awm lo. Vawiinah mipui hmaa zak miah loa dâwt hmanga campaign an la bei ngar ngar hi Mizoram mipui min ngaihnêpzia tihlannaah ka ngai," a ti.