NDA-a kan awm a ṭul hle zawk - K Vena

Lok Sabha inthlan tura MNF candidate K Vanlalvena chuan nimin khan Lunglei AOC Veng leh Venglaiahte street campaign a nei a; Pathian tan, Mizoram, hnam leh sakhua vawnghim turin BJP kaihhruai National Democratic Alliance (NDA)-a an awm a ṭul hle niin a sawi.

K Vanlalvena chuan, India ramah NDA-in sorkarna a siam mek tih sawiin, NDA-ah chuan Kristian MP-te an awm ve a ngaih thu a sawi a, "BJP Hindu hlangin Parliament-ah rorel se, Kristiante min nêk chêp vek dawn a, Kristian MP-te kan lo awm ve hi Kristiante'n min thlamuan­pui hle zawk a, NDA Kristian MP-te hi kan chhuak ang tih an hlau zek zek. Pathian tan, kan ram, kan hnam leh sakhua vawnghim turin NDA lama kan awm ve a ṭul hle zawk a ni," a ti.

NDA-a party hrang hrangte ṭhutkhawmah vawi tam tak a tel tawh tih sawiin K Vanlalvena chuan, "Na tak takin thute ka sawi ve. Min thlang tling a nih chuan kan sakhua leh Zo hnahthlakte tan theihtawp chhuahin hma ka la zel dawn. Kan ram tana ṭha lo turah chuan eng tik hunah pawh NDA zawmna hi ka titawp nghal ang," a ti a; NDA chhunga awm an nih avangin anmahni sawisel ṭhintute aiin an hriat chian zawk thu a sawi.

MNF senior vice president Dr R Lalthangliana pawhin thu sawiin, K Vanlalvena chu Rajya Sabha MP a nih angin Manipur-a Kristian unaute tawrhna nasa tak chungchangah huaisen taka ding ngam awm chhun leh sorkar laipui do ngam niin a sawi a, "Pu Vena hi kan thlang tling a nih chuan kan inchhir dawn lo, kan hlâwkpui hle ang a, kan tih fuhzia kan hriat belh zel ang," a ti.