India ramah BJP paih duhna a lian - Lalbiakzama

Lok Sabha inthlan tura Mizorama INC candidate Lalbiakzama chuan, kum 2014 aṭanga India ramah BJP-in ro an rel aṭangin khawvel mithmuhah India a tlahniam chak hle nia sawiin, BJP paih duhna a lian hle tawh niin a sawi.

Lalbiakzama hian nimin khan Champhai tlangdunga a campaign-naah thu sawiin, "Kum 2014 aṭanga BJP-te'n sorkarna an chan aṭang khan khawvel mithmuhah India a tlahniam chak hle. Tun hnaia tehna hrang hrangah pawh an tlahniam chak hle. Politics-a an khingpuite man khawmin, jail-a an tàntirte hian khawvel a barakhaih a, BJP ni lote an ṭan rual ṭhat phah thung. INDIA bloc-a tel lo party-te pawh an rawn tel phah mek a, BJP paih duhna a lian hle a ni," a ti.

BJP chakna ber chu RSS, Bajrang Dal leh VHP-te an nia sawiin Lalbiakzama chuan, "BJP sorkar hian RSS, Bajrang Dal leh VHP-te thu thua kalin tunah hian Kristian leh sakhaw tênaute tan a hnawk thei ang berin an che. Hindutva buaipui bera neitu, Kristian missionary-te'n hnawk an tih em em BJP-te do tur hian MP-a thlantlin ka nih chuan theihtawp ka chhuah dawn," a ti a; amah thlang tling turin mipui a ngen.

Lalbiakzama chuan, MNF lamin an kalna tur an tichiang tawh a, BJP lama an ṭhut tur thu an sawi chiang tawh a, ZPM erawhin an ṭhutna tur lam an la sawi chiang duh lo tih a sawi a, "Sawi chian duh lohna chhan an nei a ni. Mipuite'n central lama ZPM thawhpui tura rin an nei ṭhup a, an ring sualin ka ring lo. An duhna lamah chuan kal rawh se," a ti.

MPCC president Lal Thanzara pawhin thu sawiin, "Mizorama MP candidate kan neih zingah engti kawng zawng maha BJP sum hmang lo tur, BJP-in an control theih loh tur chu Pu Lalbiakzama, INC official candidate chauh a ni," a ti a; BJP hmalakna avanga harsatna thlengte a sawi bawk.