Mizoram House chungchangah ZPM sorkar a mualpho - MNF VP

MNF vice president Lalchhandama Ralte chuan nimin khan Mizo Hnam Rûna inkhawmah thu sawiin, Ballygunge, Kolkata-a Mizoram House chungchangah ZPM sorkar a mualpho niin a sawi.

Lalchhandama Ralte chuan, "ZPM sorkar hi Calcutta High Court lakah a mualpho a, Kolkata Mizoram House chungchangah mipui bum an tumna laihlansak a ni," a ti.

Ballygunge-a Mizoram House hlui hralh chu mipuiin ṭangkai zawka an chhawr theih tur Mizoram House lian leh dawng hlâwk zawk sak tum vang a nih thu sawiin Lalchhandama chuan, "ZPM sorkar tharin thil awm dan kimchang hre ve lote fuih pawrh nan hman tumin, ram hralhna lehkha siam tawh leh a man pawh dawn vek tawh chu mumal lo taka cancel-na thupek a tichhuak," a ti a; ZPM sorkar thupek chu Calcutta HC-in April 2, 2024-ah a hnâwl thu a sawi.

Lalchhandama Ralte chuan, Ballygunge-a Mizoram House hmun chu dan ang thlapa open tender chhuaha zawrh a nih thu sawiin, "A tira Mizoram official-te'n an chhût lâwk aia toa hralh a ni nghe nghe a, Chief Minister sawi dan chuan cheng vbc 38 chuang lai a ni," a ti.