KHAWTHLIR

NSS-in thisen pe

Saiha College NSS unit chuan nimin khan blood donation camp an huaihawt a; Siaha District Hospital tan thisen unit 20 an pein, petute mipa 18 leh hmeichhia pahnih an ni.

Inpuih dan tur rêl

Aizawl district election officer Nazuk Kumar hoin nimin khan DC conference hall-ah Lok Sabha inthlan atana vote thlaknaah Aizawl district-a polling station ṭhenkhata puih ngaite puihna pek dan tur sawiho a ni. Vote thlaktu zingah harsatna nei tan helpline number 1950 (toll free) leh 0389-2317440 ah engtik lai pawha biak theih a nih thu an tarlang.

CEO-in endik

Chief electoral officer Madhup Vyas chuan nimin khan Lok Sabha inthlanpui hmachhawn tura Kolasib district inbuatsaihna hrang hrang a endik a, DC conference hall-ah inthlan kaihhnawih sorkar hotute a kâwm. CEO chuan, mipui aiawh thlan chhuahna tura vote thlak ngaih pawimawh kawngah state dangte entawn tlak khawp, model state ni tura ṭan lâk a pawimawh thu a sawi.

Home voting zirtir

Mamit DC pisaah nimin khan Lok Sabha inthlanpuia mahni in lama vote thlâk (home voting) kalpui tur atan mawhphurhna neite thil pawimawh zirtir an ni a, master trainer Lalchhandami, SDC-in thil pawimawhte a hrilhfiah. Mamit district-a khaw 34-ah in lama vote thlak tur rualbanlo mi 30 leh kum 85 chin chung lam mi 82 an awm a; home voting team 11, poll officer leh micro observer-te'n an vil dawn. Home voting hi vawiinah ṭan a ni ang.

General observer hoin thukhawm

Lok Sabha inthlan tura Mizoram tana general observer Dr Nipun Nayak hoin nimin khan Siahaa District Rural Resource Centre-ah nodal officer-te an ṭhukhawm a, district election officer VL Hruaizela Khiangte-in a kaihruai. Nodal officer-te'n an hna chanpual, an hmalakna leh hmabakte an sawifiah. Ṭhutkhawm zawhah Dr Nipun Nayak chuan EVM dahṭhatna, vote chhiatna tur hall leh Central Armed Police Force (CAPF)-te riahna tur pindante a enfiah. Siaha district-ah hian CAPF company pakhat an awm dawn a ni.