Kawlphetha man tihpun a ni lo; Sorkarin subsidy a pek belh dawn

Sorkar kum kal mek 2024-25 chhungin Mizoramah kawlphetha hman man tihpun a ni dawn lo. Kawlphetha man tihpun a nih dawn loh avangin Mizoram sorkarin mipui tan subsidy a pek belh dawn.

Joint Electricity Regulatory Commission (JERC) for Manipur & Mizoram aṭanga thu dawn danin, Mizoram sorkar chuan kum 2024-25 atana kawlphetha hman man tipung loin, mipui tana subsidy sorkarin a pek ṭhin tihpun a rawt. Mizoram sorkar duh dan chu JERC chuan a pawm a, kum 2023-24 tariff hman zui a ni ang.

Kawlphetha hman man tihpun a nih dawn loh avang hian Mizoram sorkarin mipui tana kum 2024-25 chhunga subsidy a pek tura chhût chu cheng vbc. 197.23 a ni. Kum 2023-24 khan subsidy atan cheng vbc. 98 vel sorkarin a sêng a, kum 2024-25 ah chuan a lêt aia tamin a pung dawn.

JERC tarlan danin, kum 2024-25 chhunga Mizorama consumer-te kawlphetha hman zat tur chu 546.79 MU ni tura chhût a ni. Kum 2024-25-a tariff hmangin Power & Electricity department-in kum 2024-25 hian consumer-te aṭangin cheng vbc. 437.41 a hmu thei tura beisei a ni a, a pumpuia chawhrualin kum 2024-25 chhunga unit khat man tur chu Rs 8 a ni.

Kum 2023-24 aia kum 2024-25 chhunga kawlphetha hman zat a tam dawn avangin tariff tihsan ni lo mah se, kum thara chhiah hmuh tur chu kumina hmuh tur beisei zat aiin cheng vbc. 63.50-in a tam. Tariff order thar chu March 15, 2024 khan siam a ni a, kawlphetha April 1, 2024 aṭanga hman man chhûtna tur a ni.

Power & Electricity department-in kum 2024-25 chhunga consumer-te kawlphetha pek nan unit khat zelah Rs 11.83 mamawh tura an insawi laiin, JERC-in ARR a bituk aṭanga chhûtin an mamawh chu unit khat zelah Rs 11.61 a ni. Rs 11.61 hi subsidy tel loa chawhruala unit khat zel man tur full cost tariff (FCT) a ni a, sorkarin subsidy a pek loh chuan FCT hman tur a ni.

Sorkarin subsidy a pek tur cheng vbc. 197.23 chu thla tin cheng vbc. 16.43 zela pek lâwk tur a ni, a pek loh chuan FCT hmangin bill siam tur niin, sorkarin subsidy a pek hunah bill-ah siamrem leh tur a ni ang.

Mizoram sorkarin subsidy a pek avangin tláwm zawkin mipui hnenah chawhrualin unit khat man Rs 8 vel zelin an pe thei dawn. Sorkarin consumer-te subsidy a pek sak tur hi a pumpuia chawhrualin unit khatah Rs 3.61 vel a ni.