Kum 2023-24 chhungin Taxation-in chhiah cheng vbc. 1,112.58 an hmu; Vbc. 91.92-in a pung; vbc. 14.08-in target khûm

Mizoram sorkara Taxation department chuan kum 2023-24 chhungin chhiah cheng vbc. 1,112.58 an hmu a, kum hmasa 2022-23 aiin cheng vbc. 91.92-in chhiah hmuh a pun bakah, hmuh zat tura ruahman chu cheng vbc. 14.08-in an khûm.

Taxation department tarlan danin, Mizoram sorkarin kum 2023-24 chhunga Taxation department sum hmuh zat tura a bituk chu budget estimate-ah cheng vbc. 1,000 a ni a, revised estimate-ah vbc. 1,098.50-ah tihsan a ni.

Kum 2023-24 chhungin Taxation department chuan chhiah cheng vbc. 1,112.58 an hmu a, revised estimate-a target siam chu vbc. 14.08-in an khûm. Kum 2023-24 chhunga chhiah hmuh zat hi kum 2022-23 chhunga an hmuh aiin cheng vbc. 91.92 (9%)-in a tam zawk.

Taxation department-in financial year 2023-24 chhunga chhiah a hmuhna lian zualte chu - Goods & Services Tax (GST) aṭangin vbc. 970.25, Value Added tax (VAT) aṭangin vbc. 125.93 leh Professional Tax aṭangin vbc. 16.37 a ni. GST hman a nih hmaa Entertainment Tax aṭanga chhiah bá lut Rs 30,000 leh Firms & Societies registration fee Rs 2,19,370 a tel bawk.

Taxation department hotute chuan, kum 2022-23 aia kum 2023-24 chhunga chhiah hmuh zat a pun chhan ber pakhat chu sumdawngte an nih thu an sawi a, "Chhiah a pun hian sumdawngte an inhralh ṭha a, GST an pek a pung a ni thei," an ti.

Taxation hotute chuan, "Thla tina GST an rawn pek ang ang hi kan lo pawm phawt a, kum tâwp lamah scrutiny leh audit hmangin bungrua an lak luh dante nen kan endik leh ṭhin. Sumdawng ṭhenkhat chuan an hralh zat aṭanga chhûtin chhiah an pek tur aia tlemte an lo pe a, chutiangte chu an pek tur ang zat kan pek belhtir leh ṭhin," an ti a; department-in sumdawng zawng zawng vil vek sêng lo mah se, theihtawp chhuahin an vil tih an sawi.

Mizorama GST luhna lian tham tak pakhat chu sorkar hnuaia contract hnathawhte a ni a, contract hna lian a tam leh tam lohin Taxation department-a chhiah lut zat a hril tih an sawi a; tun hnaiah SASCI leh PMGSY hnuaia contract hna thawhna bill contractor-te hnenah pek chhuah a tlem avangin GST a lut tlem deuh a, mahse, contactor-te'n bill an lak hunah a lut leh mai dawn tih an sawi bawk.