Heroin neitu kum 10 táng turin hrem

Heroin gram 324 kawl vanga Excise & Narcotics department (END)-in an man Zarzova (45) s/o Tlangkhuma, Mauchar, Aizawl district chu Kolasib Fast Track Court chuan hrehawm taka kum 10 táng tur leh Rs 1,00,000 chawi turin a hrem.

Kolasib Fast Track Court thuremnaa tarlan danin, END-a Anti Narcotics Squad chuan March 20, 2021 khan Mauchar khaw mi pahnih - Zarzova leh Lalduhawma (25) s/o Thangmawia te chu Kolasib district-a Bûkpui khaw huam chhung, Ralbawm ramah an man a; Zarzova'n heroin gram 324 (hawng 26) a kawl chu mi dangte nen inpek an tum laiin END mite chuan an man a, bike khalhtu Lalduhawma an man tel bawk.

Mi pahnihte lakah hian END chuan Narcotic Drugs and Psychotropic Substances Act, 1985 tlawh­chhanin thubuai an ziak lut a; Fast Track Court, Kolasib judge R Vanlalena'n a ngaihtuah hnuah nimin khan thutlukna (judgment & sentence order) a siam ta a ni.

Zarzova chu hrehawm taka kum 10 chhung jail-a táng tur leh Rs 1,00,000 chawi tura hrem a ni a, pawisa a chawi loh chuan kum khat dang a tàn belh ang. Bike neitu Lalduhawma erawh chu a bike Zarzova'n taxi anga a hmansak a ni a, Zarzova thil tih chu a hriatpui loh avangin Court chuan a chhuah zalen thung.