Governor leh STPI hotu inkâwm

Governor Dr Hari Babu Kambhampati leh Software Technology Parks of India (STPI), Aizawl deputy director KV Chandra chu nimin khan Raj Bhavan-ah an inkâwm.

Governor Dr Hari Babu Kambhampati chuan, STPI-in Mizo ṭhalaite kutkawih eizawnna lama an luh theih dan kawng hawnsak an tum dante a zawt a; STPI hnathawh leh hmalak tum dan chu mipui hnenah thuthar thehdarhtute hmanga puangzar turin STPI hotu chu a chah.

KV Chandra chuan Governor chu STPI hmalaknate a hrilh a; Mizoram University leh National Institute of Technology, Mizorama zirlaite nen open channel programme leh social media hmangin inpawh tawnna an neih ṭhin thute a sawi.

STPI Aizawl hi August 11, 2018 khan Guwahati Directorate-in Mizoram hnuaiah a din a; Mizoram sorkara Information Technology & Communication department nen Ṭhuampui, Aizawlah sq.ft. 4690.62-a zau centre an din a ni.