Kan ram tan chuan ka thi ngam - K Vanlalvena

MNF party chuan nimin khan Lok Sabha MP inthlan atan Tlabung leh Chawngteah street campaign an buatsaih a; an candidate K Vanlalvena chuan, Mizoram tan chuan a thih ngam thu a sawi.

K Vanlalvena chuan, English leh Hindi thiam nâl tak Mizoramin MP a neih tawhte'n ram a vei chanve pawha an vei a rin loh thu a sawi a, "Manipur Meitei unau te, Assam sorkar leh Myanmar sipaite huat hlawh khawpin Zo hnahthlakte thlavâng ka hauh. Delhi thlengin Assam Police-te'n min ûm zui," a ti.

A nunna atana hlauhawm khawpin beih a tâwk nia sawiin Vanlalvena chuan, "Kan ram tan chuan thih pawh ka hlau lo. Meitei leh Myanmar sipaite nasa taka huat ka hlawh. Ka thlavâng hauhsakte hian min hnâwl leh si chuan ka MP leh zelna turah ram tan au chhuah pawh zahthlak ka ti tawh khawpin ka ring," a ti a; vote hmanga duhsakna a laka lantir turin Mizoram mipui a sáwm.

Rajya Sabha MP chuan, Covid vanglaia MP ṭan a nih thu sawiin, "Kan zin ve pawhin kan haw veleh kar khat chuangte min quarantine ṭhin. Kum thum leh thla riat MP ka nih chhung khan Mizoram tan thil ṭha tam tak tih duhin development work-te pawh hai chhuah duh mah ila, MP ka nih chhung khan kan ram tan ka duh angin thil ṭha ka ti hman lo a, hrehawm ka ti hle," a ti.

MNF senior vice president Dr R Lalthangliana pawhin thu sawiin, K Vanlalvena chu ram leh hnam tan jail-a vawi riat leh lock up-a vawi thum lut tawh a nih thu a sawi a, "Hetiang hi MP leh MP candidate kan neih tawh zingah an la awm lo. Lok Sabha MP-ah hian lo thlang tling u la, a hmun ruak Rajya sabha MP hi chu ruling party-in an luah mai ang," tiin, MP chu an insem mai tur thu a sawi.

Dr R Lalthangliana chuan K Vanlalvena chuan Parliament chhungah mahni nihna zahpui hauh loa 'Tribal MP ka ni' ti ngat ngam a nih thu sawiin, "Vai MP mihring tlim hmur zingah, Mahni nihna ang anga lang ngam, Zohnahthlak hnam hrang hrangte aiawh zo, Pu K Vanlalvena hian vote a phû hliah hliah a ni," a ti.