Myanmar nena insumdawn tawnna hna hmasa berah ka nei dawn - Lalbiakzama
Lok Sabha inthlan tura Congress party candidate Lalbiakzama chuan nimin zing khan Champhai Vengthlanga vantlang inkhawmah thu sawiin, MP-ah thlan a nih chuan Zokhawthar kaltlanga Myanmar nena insumdawn tawnna chu tun hma anga tluang taka a kal theih nan hna hmasa berah a neih dawn thu a sawi.
Lalbiakzama chuan, India leh Myanmar insumdawn tawnna chu Mizoram tan a pawimawh hle tih sawiin, "Kan economic a khawih danglam pha hial a ni. Tun hnaiah a nih tur ang ni loin, a function ṭha hlei thei lo. MP-ah thlan tlin ka nih chuan Zokhawthar kaltlanga Myanmar border trade hi tun hma anga tluang taka a kal leh theih nan hna hmasa berah ka nei ang," a ti.
Indian Constitution-a Article 371G-in Mizo hnam dan a humhalh tih sawiin Lalbiakzama chuan, "Hei hi kan hman ṭangkai viau a ngai. Uniform Civil Code pass a ni ta a, ṭawngkáa Mizoram a tel ve lo ti ngawt loin, India Danpui 371G-in a humhalh angin Mizoram chu UCC hian a huam ve lo ang tiin Rules-ah an ziak em?," a ti a, dan chhungah ziaka an dah a nih loh chuan ṭawngka ringawt chu a thlamuanthlak lo tih a sawi.
Lalbiakzama chuan, kum 2013 chhungin India ramah Kristian tihduhdahna, missionary-te nêkchêp leh nghaisakna vawi 687 a thleng nia sawiin, "Kristiante tihduhdahna a thlen lai hian engtin nge Mizo Kristiante zingah BJP kan awm theih? An lamṭang pawh engtin nge kan la awm theih? Kristiante dikna chanvo chhuhsaka min nêkchêp lai hian engati nge kan MP-te hian Parliament chhung leh páwnah an au chhuah loh? MP ka nih chuan khawvel hriatah India rama Kriatiante tawrhna hi ka au chhuahpui ang," a ti.
MPCC president Lal Thanzara pawhin thu sawiin, "Kum tèlin Kristiante tawrhna India state hrang hrangah a hluar tial tial. Central-ah BJP kaihhruai NDA an sorkar aṭang hian kan missionary-te an chêp em em a. Assam BJP sorkar chuan Lalpa tihdam rawngbawlnate an khap ta hial," a ti a; Lok Sabha inthlan tur chu kum dang zawng aiin a pawimawh nia sawiin, vote thlak taima turin Mizoram mipui a ngen.
Tun hmain harsatna nei loin Zokhawthar border trade kaltlangin sumsawnna bungrua Myanmar aṭangin lak luh a ni ṭhin nia sawiin Lal Thanzara chuan, "Congress party-in sorkarna kan chan leh hunah tun hma ang khan harsatna nei loa sumdawnna kal leh turin hma kan la leh ang," a ti.