Lirthei an rawn luh thuai beisei

Assam-in kawngpui an dan loh veleh ramriah BSF-te dah an ni ang - CS

Lalnunmawia Chuaungo chuan, Assam-in October 28, 2020 aṭangin kawngpui an dang ṭan tih sawiin, "Mipuiin harsatna an tâwk tih kan hria. Chutih lai chuan, ramri buai vang a ni tih hriaa Mizo mipui kan ṭanho leh thawhho ṭhat avangin tun hun hi kan thleng a ni. Mipui leh páwl hrang hrangte dawhtheihna leh ṭhahnemngaihna a lawmawm tak zet," a ti.

Chief Secretary chuan, ramri buai chingfel tur leh lirthei dan tihtawp a nih theihna atan sorkarin theihtawp a chhuah tih sawiin, "Chief Minister-in sorkar laipui lam hotute a be reng a, kei pawh Union Home Secretary nen ni khatah vawi thum vel kan inbe reng a ni," a ti a; Assam lamin buaina chhuah hnua ramria Mizo IR police dahte hnukkir tura an phût tlat avangin hmasawn a harsat thu a sawi.

Mizo IR police-te awmna hmun chu Assam lam chuan an ramah an ngaih thu sawiin Chief Secretary chuan, "Keini lam chuan kan ram chhung ngei a nih thu kan sawi thung. Police kan dahte withdraw phûtna atan kawng an dang a ni. MHA pawhin theihtawp a chhuah reng a, thil awlái a ni lo, chhe tê tal offer nei ve turin min ngen a ni. Kan dinhmun thlirin police kan hnuhkîr theih loh thuin kan chháng ṭhin," a ti.

Lalnunmawia chuan, central sorkarin duh leh dil vang ni loin BSF company pathum ṭul tih anga hman turin an rawn dah nia sawiin, "Ramri buai zual laiah dah kan tum. Vairengteah company pakhat leh platoon pakhat, Saihaipui V-ah platoon pahnih leh Thinghlunah platoon pakhat dah kan tum. Ramriah hian facility ṭha nei loin police tam tak kan dah a ni," a ti a; ramria police ṭhenkhatte chu lâk lêt an nih tur thu a sawi.

Chief Secretary sawi danin, Vairengteah chuan BSF-te chu tuna Mizo IR police-te awm mekna thlangah dah tum an ni a, Saihapui V-ah chuan tuna Mizo IR awm mekna leh Assam police ho awmna chhehvelah dah an ni dawn. Ramria Mizoram police awm mekte chu Assam lamin phût mah se, hnuhkìr vek an ni dawn lo a, mipui thlamuan tham tur an awm chhunzawm ang.

Zawhna chhangin Chief Secretary chuan BSF-te chu Mizoram Police kaihhruaina hnuaia awm tur an nih thu a sawi.

Union Home Secretary hoa inbiaknaah Assam lamin duh dan leh phût tam tak an neih thu sawiin Lalnunmawia chuan, "Tihhlawhtlin vek chi a ni lo. Mizoramin ramriah BSF dah se, Assam-in vawiinah (Pathianni) kawng hawng rawh se, tiin thutlukna siam a ni. Vawiin (Pathianni)-a kawng hawn hman a nih loh pawhin, naktuk (Thawhṭanni)-ah chuan hawn hman a nih ngei ka beisei," a ti.

Lalnunmawia Chuaungo chuan, ramria buainain ziaawm lam a pan a beiseiawm tih sawiin, "Buaina chhuak tur záwnga hma la lo turin mi tin kan ngen. Tharum thawha chinfel chi a ni lo. Assam lam chuan ramria kan police-te withdraw vek leh anmahni lam pawh withdraw vek an duh a, tunah chuan kan la thei ve lo. Boruak azirin sawiho zel a ni ang," a ti a; police-te lâk lêt ni se chuan, kawng an dan lohna a rei tawh tur thu a sawi.

Mi fing leh thil hre àwm tak taka ngaih, sorkara tawnhriat neite pawhin Assam lama lirthei tangkhangte 'Police hmanga hruai chhuah mai àwm' tia rawtnate an neih thu sawiin Chief Secretary chuan, "A zialo tak tak a ni. Chutianga tih chi a ni lo. Mipuite a ni lo záwnga infuihpawrh tumna a ang thei," a ti.

•    Vawiin (Pathianni)-a lirthei an rawn luh hman loh pawhin naktuk (Thawhṭanni)-ah an rawn luh hman ka beisei.

•    Mizo mipui kan ṭanho leh thawhho ṭhat avangin tun hun hi kan thleng.

•    Mizoram sorkar leh MHA pawhin ramri chinfel turin theihtawp a chhuah reng.

•    Assam lamin ramria IR police-te hnuhkir vek an phût a, tunah chuan kan thei rih lo. Police  ṭhenkhat kan hnu kir ang.

•    Mipui thlamuan tham ramriah IR police dah chhunzawm zel a ni ang.

•    Kan IR police-te hnûkkîr duh ila chuan lirthei dan an tihtawpna a rei tawh ang.