Ballygunge-a Mizoram House nei lêt leh turin a tàwp kan thleng dawn - Lalduhoma

Chief minister leh ZPM leader Lalduhoma chuan, MNF kaihhruai sorkarin Ballygunge, Kolkata-a Mizoram House hmun a hralh chu pawi a tih tak zet thu leh Mizoram mipui rilru a nat thu sawiin, nei lêt leh turin court rorelna sang ber thlenga kal an tum thu a sawi.

CM Lalduhoma hian Lok Sabha inthlan atana Saikawrdai tlangdunga campaign a neihnaah thu sawiin, "Sorkar hmasa MNF-in Kolkata khawpui, Ballygunge road-a Mizoram House an hralh ngawt mai kha a pawi tak zet a, Zoram mipuite rilru a na hle a, keini chuan hralh kan phal lo. Neih belh aia kan neih sa tiral zawnga an khawsa hi a mak hle. High Court-ah thiam chang lo mah ila, Mizoram mipui tan Supreme Court thlengin a ṭul angin zelin kal kan tum a, a tàwp kan thleng dawn a ni," a ti.

High Court thuthlukna avanga MNF ho an lawm hle nia sawiin Duhoma chuan, "Ram leitu ang maia hnehna hlado an lo chham ve chiam hi a zahthlak a, Mizo mipui min zah lohnaah kan ngai," a ti a; a hmun hre chiangtu Kolkata-a Mizo mipui leh Mizo welfare-te pawhin Ballygunge-a House hralh a ni chu pawi an tih thu, thuchhuah siam hiala an tarlan thu a sawi.

Lalduhoma chuan, "Mizoram House leitu Excel Vincom Pvt Ltd. phênah hian mawng lang kûkin tute emaw chu an ṭhu niin a lang. Mizoram ro hlu, Kolkata khawpui lailia mi heti em em maia hralh an châk hi a pawi tak zet a ni," a ti.

CM Lalduhoma chuan, MNF vice president Lalchhandama Ralte-in April 8, 2024-a Mizo Hnam Rûna thu a sawiah, Ballygunge-a Mizoram House chungchangah ZPM sorkar chu Calcutta High Court laka mualpho ang leh mipui bum an tumna laihlansak ang hiala a sawi chu mak a tih thu leh, an pute sûlhnu pawr sawi mâm tum ringawta hmanhlel a nihna a langa an ngaih thu a sawi.

Lalduhoma chuan, Ballygunge-a Mizoram House awmna chu khawpui laili a nih avangin a hlu tak zet tih sawiin, "Khawpui lailia awm a nih avangin MNF sorkarin an hralhna man pawh a sang hle a, vbc. 38 chuang zet a ni. A hralhna aṭangin hmun dangah a aia ṭha zawk tur Mizoram House sak sawi a awm a, mahse, hetiang lam bawhzuina reng reng a awm ta lo," a ti a, ram hralh ringawtah hmanhmawh deuha nawrna a awm thu a sawi.

MNF sorkarin ram an hralhnaah MoU-a a lan danin, clause pahnihah ram hralh chu sût (cancel) leh theihna a awm tih sawiin Duhoma chuan, "File-te kan zir chian hnuah Sale Deed kan la ziahpui loh avang leh a neitu thar hmanga registration tih a la awm lo bawk nen, kan cancel ta a ni. Mahse, mak tak maiin High Court-ah min khing a, tun dinhmunah Mizoram sorkar leh mipuite'n thiam loh kan chang lailâwk a ni ta ber," a ti.

Lalduhoma chuan, Ballygunge-a Mizoram House chu sak ṭhat turin kum 2019 khan ṭhiah a ni tih sawiin, "A sakna tur ruahmanna pawh awm vek tawh chu tihral tumin an hmanhlel ta zawk a. Damlo inenkawl ngai leh khualzin eng emaw zatin Kolkata an pan ruih ruih reng avangin neihthinglung kháwnga Kolkata pan ve hram hramte tan thlenna tur a lungngaihthlak ta hle," a ti a; Ballygunge-ah ngei Mizoram House tha zawk leh changtlung zawk Mizoramin a mamawh thu a sawi.