MNF LC-te an inhmukhawm

Aizawl Municipal Corporation (AMC) huam­­chhunga MNF local council member-te chu nimin khan MNF pisa-ah an inhmukhawm a, Aizawl khawpui enkawlna kawnga AMC hnuaia local council-ten hna an thawh dan hrang hrang leh Lok Sabha inthlan lo awm turte an thlirho.

He hun hi MNF MP (RS) Election Campaign Directorate chairman Tawnluia'n kaihruaiin, resolution paruk an pawm.

Resolution an pawmte

☑ AMC huamchhunga veng hrang hrangten MNF sorkar hnuaiah ni tin mamawh chi hrang hrang - gas, tui, buhfai etc. hnianghnar taka kan hmu ṭhin kha lawmawm kan tiin, ZPM sorkar hnuaiah Aizawl khawpuiin hun hmasa lama tui hnianghnar leh gas/buhfai supply kan dawn ṭhin ang dawn leh kan in beisei tlat. Fur leh ṭhal lo thleng turah hian ruahmanna fel tak lo nei lâwk turin kan beisei a ni.

☑ MP (Lok Sabha) Inthlan lo awm turah K Vanlalvena, mi huaisen leh hrat khawkheng, hnam pasalṭha kan nei hi a lawmawm kan tiin, kan chhuang takzet. MP (RS) a nih chhunga a hnathawh leh a chêt dan en in MP nihna tihlutu a ni a, thlan tlin chakawm tak leh rintlak a ni.

☑ Mizoram mipui aiawha Parliament House a ṭhu tur hian K Vanlalvena hi kan ring tawk. Hnamdang kara zam hauh loa, a Mizo nihna leh Kristian nihna a lantir ngam te, Mizoram mai ni lo, kan ṭhenawm ramdang leh state danga awmte harsatna a taka hre chung a, an thlavang huaisen taka a hauh ngamte hi fakawm kan ti takzet. A huna huaisen ngam MP neih chhunzawm zel hi kan duh takzet a ni.

☑ Kan state ṭhenawm (Assam) nena ramri buaina kan tawh chungchanga huaisen taka a auchhuak ngam kha ropui kan tiin kan chhuang takzet. Assam sorkarin man tuma a police uisathiam nen an um rap rap na kara zam hauh loa a hmachhawn ngamte kha chhuanawm kan tiin, Mizoram tana pasalṭha nihna a nunpui ngamah kan ngai a, nunpui chhunzawm zel turin hun ṭha Zoram tana thawk zel turin kan duhsak tak meuh a ni.

☑ Sakhaw tlem zawk leh hnam tenau zawk kan nih avanga India ram chhunga nekchep kan nih mekna kara huai taka ding chhunzawm ngam tur MP kan neih chhunzawm ngei hi kan duh takzet a ni.

☑ He inthlan lo awm turah hian Zoram puma hnehna kan channa tura Aizawl khawpuiah hian hnehna sang tak kan chanpui theih nan theihtawp chhuah kan inhuam. Kan ram, kan hnam leh sakhaw him nan Zoram mipui zawng zawngte K Vanlalvena vote vek turin kan sawm tak meuh a ni.