Uluk takin candidate kan thlang - K Sapdanga

ZPM hruaitu K Sapdanga, Home minister chu Lok Sabha inthlan atan campaign-in nimin khan Tuirial bial khaw hrang hrang a tlawh a; MP candi-date tur uluk taka an thlan thu a sawi.

K Sapdanga chuan, Mizoram tun dinhmun leh hun lo la awm zel tura tu leh fate hmakhua thlir chunga vote thlak a pawimawh thu a sawi a, "MP hi kan state sorkar leh central sorkar inkara palai hnathawk tur a nih avangin uluk takin kan hruaitute'n candidate thlan chungchangah ngaihtuahna an sêng a, mi ṭha tak mai candidate kan neiin kan hria a, kan lawm hle," a ti.

ZPM candidate chu vai rama seilian a nih bakah, ṭawng chungchangah pawh harsatna nei lo a nih thu sawiin Sapdanga chuan, "Candidate ṭha leh mawngzâng tak, social worker ṭha tak leh project hai chhuak zung zung thei tur a ni. Delhi-a tlángnél em em thei tur, a thil tihna apianga rintlak leh rinngam mi a ni," a ti a, engkimah duhthusam a nih ber thu a sawi.

K Sapdanga chuan, Mizoram tana thawk turin hnathawh kawr an ha ve ta tih sawiin, "Hmachhawp kan ngah thu kan sawi fo. Kan hmaa tih tur awm reng reng hi Pathian kaihhruaina tel lo chuan kan hmachhawn ngam lo. Kan ram rorelnaah Pathian ram lo thleng turin kan au a, a tak ram a thlen ngei theihna turin kan ṭanrual a ngai. Chung lam malsawm tlaka hna thawk turin kan insáwm a ni," a ti.