KHAWTHLIR

CTP-in thisen pe

Siaha khawpuia Catholic Ṭhalai Pawl chuan nimin khan Siaha District Hospital blood bank-ah thisen unit ruk an pe a, petute mipa vek an ni.

Vawk lak luh khap

Champhai bawrhsap James Lalrinchhana chuan thupek chhuahin, Champhai district-ah ram dang leh state dang aṭanga vawk, vawksa leh vawksa aṭanga siam reng reng lak luh khap a nih thu a tarlang. Vawk damlo talh khap a nih thu tarlangin, "Vawk damlo a awm chuan dah hran vat tur a ni a, vawk thi rêng rêng thûk taka phûm tur a ni. Vawk thi leh damlo an awmin AH&Vety hotute hriattir vat tur a ni," a ti. Thupek zâwm lote chu IPC Section 188 hmanga hrem theih an ni.

World Health Day

April 7, Pathianni kha World Health Day a ni a, he ni pual hian Mizorama zirna-in pakuaa NSS unit-te chuan nimin khan hmun hrang hrangah hun an hmang. NSS-te hian webinar leh awareness programme bakah, blood donation camp leh HIV/AIDS thisen endik rûnpui an buatsaih a, mi 1,500 vel an tel. Kumina World Health Day thupui chu 'Ka hriselna, ka chanvo' tih a ni.

HMIS inzirtir

Health department chuan nimin khan Champhaia IPR conference hall-ah Health Management Information System (HMIS) hnuaia hmalakna chungchang inzirtirna an buatsaih a; Champhai district-a damdawi-in hrang hranga medical officer leh HMIS portal khawihtute an tel. Kum 2023-24 chhunga bial tina HMIS neih dan thlir lêt a ni a, sorkar kum thar 2024-25 atana hmalak dan tur inhrilhfiah a ni bawk.

Home tanpui

Saitual district bawrhsap Dr Lalngura Tlau chuan nimin khan a pisaah Governor Discretionary Fund aṭangin Hlimna In (Girls Home) hnenah Rs 23,400 a hlan. Salvation Army enkawl Hlimna Inah hian naupang 11 awmin, sikul kal lai vek an ni a, thawktu mi 10-in an enkawl a ni.