COVID-19: Mizoram dinhmun Ni 2 chhungin mi 99 hmuh belh

November 6, Zirtawpni khan Mizoramah Covid-19 vei mi 42 hmuh chhuah niin, November 7 khan mi 57 hmuh belh leh a ni a, ni hnih chhunga hmuh chhuah zawng zawng chu mi 99 an ni. Thla hmasaa hmuh tawh, record-a la thun loh thun thar pakhat a awm bawk. Inrinni leh nimin khan mi 123 chhuahtir an ni.

November 6-7 chhunga Mizorama hripui vei hmuh chhuah mi 99 leh a hmaa hmuh tawh record-a thun thar mi pakhatte chu mipa 54 leh hmeichhia 46 an ni a; ZMC-a hmuh mi 81 leh Rapid Antigen Test (RAT) hmanga Aizawl, Lunglei, Champhai leh Lawngtlaia hmuh mi 18 an ni. Ni hnih chhung hian TrueNAT-PCR hmanga endik zingah hripui vei hmuh a ni lo.

Hetih lai hian, Covid-19 positive enkawl, a negative tawh vanga November 7, Inrinnia BSUP, Durtlang CCC aṭanga chhuahtir zinga mi pakhat chu Covid-19 positive record-ah telh a la ni lo tih hriat chhuah a ni a; chuvang chuan record-ah thun thar a ni. Amah hi October 27-a hmuh chhuah a nih thu sorkar thuchhuahin a tarlang.

Inrinni khan hripui laka fihlim tawh mi 31 an chhuak a, niminah mi 92 an chhuak. Ni hnih chhungin SRH-ZMC aṭangin 16, Durtlang BSUP aṭangin 95, home isolation-a awm pathum, CCC dang - Berawtlang aṭangin pali, Lawngtlaiah pathum, Gilead School leh Thenzawl aṭangin pakhat ve ve an chhuak a ni.

Mizoramah Covid-19 positive mi 3,090 hmuh chhuah a ni tawh a, mipa 2,333 leh hmeichhia 757 an ni. Mi 3,090 zinga mi 2,618 (84.72%) chhuahtir an ni tawh a, mi pahnih (0.06%) thi tawhin, enkawl mek mi 470 (15.22%) an awm.

November 6, Zirtawpni khan ZMC laboratory-ah mi 1,254, TrueNAT-PCR hmangin district pariatah mi 129 leh RAT hmangin district 10-ah mi 599-te swab sample endik a ni a, an vaiin mi 1,982 an ni. Inrinni khan ZMC-ah 887, TrueNAT-PCR hmangin district pariatah 94 leh RAT hmangin district pakuaah 401 endik a ni a, a vaiin sample 1,382 a ni. Ni hnih chhunga Mizorama sample endik zat chu 3,364 a ni.

Covid-19 vei November 6-a hmuh chhuah mi 42 zinga 28 chu ZMC laboratory-a hmuh chhuah a ni a, mipa leh hmeichhia 14 ve ve, Aizawl district-a sample lak vek an ni. A naupang ber kum 8 a nih laiin, upa ber chu kum 63 a ni thung.

Mi 28 zinga 19 chu Mizoram chhunga kái chhâwng (local positive contact) an ni a, mi pakua chu tun hnaia state páwn aṭanga rawn lut an ni. State páwn aṭanga rawn lut zinga pathumte chu Chaltlang veng mi mipa kum 5 leh 28 leh, hmeichhia kum 29 an ni a; mipa kum 28 chu Kolkata aṭanga haw niin, mi dang pahnih chu Pune aṭanga haw an ni.

Mipa pakhat chu kum 27, Lengpui Airport-a hna thawk, tun hnaia rawn lut, quarantine facility-a khung hran lai a ni a, symptom a nei. Mi dang panga, mipa vek chu Mizorama hna thawk tura lut, Bung Bangla quarantine facility-a awm lai an ni. State páwn aṭanga rawn lutte hian symptom an nei lo.

Mizoram chhunga hri kái mi 23-te dinhmun chiang zawk chu table-ah tarlan a ni.

RAT hmangin Aizawl, Lunglei leh Champhaiah mi 14 hmuh chhuah a ni a, mipa pariat leh hmeichhia paruk niin, naupang kum 1 mi a tel. An zinga pahnih, Chawnpui venga hmeichhia unau pahnih chu November 5-a hmuh tawh an ni a, record-a telh loh, November 6-a telh tâk a ni.

RAT hmanga hmuh chhuahte hi Aizawla hmuh mi 12 leh, Lunglei leh Champhaia hmuh mi pakhat ve ve an ni a; an vaiin Mizoram chhunga kai vek an nia hriat niin, an dinhmun chiang zawk chu table-ah tarlan a ni.

November 7, Inrinnia hripui vei hmuh chhuah mi 57 zinga 53 chu ZMC-a hmuh a ni a, pali chu RAT hmanga hmuh niin, TrueNAT laboratory-ah hmuh a ni lo.

ZMC-a RT-PCR hmanga hmuh chhuahte chu mipa 28 leh hmeichhia 25, Aizawl district-a sample lak vek a ni a; Mizoram chhunga kái mi 47 leh state páwn aṭanga rawn lut thar mi paruk an ni.

State páwn aṭanga rawn lut zinga mipa pakhat, kum 20 mi chu Falkland Venga awm a ni a, Bihar aṭanga rawn lut, home quarantine-a awm, symptom nei lo a ni. Mi dang panga chu Border Security Force (BSF) sipai panga, kum 30, 31, 38, 41 leh 47 an ni a, RAY quarantine centre, Falkland Venga awm lai an ni a, symptom nei an awm lo.

Mizoram chhunga káite dinhmun chiang zawk chu table-ah tarlan a ni.

RAT hmangin mi pali - mipa pathum leh hmeichhia pakhat hmuh chhuah an ni a, Champhai leh Lawngtlai district mi an ni. Champhaia hmuh mi pakhat chu hmeichhia kum 65, Champhai Vengsanga cheng, symptom nei lo, Mizorama kái a ni a; Lawngtlaia hmuh mi pathumte chu mipa kum 18, 20 leh 35, RDS company hnuaia thawk, tun hnaia Mizoram páwn aṭanga rawn lut niin, symptom nei lo vek an ni.