Ṭhelrêt hnài dan zir turte Zira'n a vailiam

Land Resources, Soil & Water Conservation (LRSWC) department chuan ṭhelrêt hnâi dan leh sâwngbâwl dan zir turin a chíngtu mi 50-te chu training turin a thlang a, chu'ng training turte chu nimin khan LRSWC minister R Lalzirliana'n directorate kawt aṭangin a vailiam. Ṭhelrêt chingtute hi Exodus Rubber Society Training Centre, Khamrangah chawlhkar khat chhung an inzir dawn a ni.

LRSWC Minister chuan, Mizorama ṭhelrêt chíngtu zinga tam takin hun rei tak chhung thâ leh sum sênga an nghah puitlin ṭhelrêt kung tam tham tak hnài theiha a puitling ta chu a lawmpui thu sawiin, "Ṭhelret chíngtute thawhrimna hian Mizoram tan sum leh paiah hmasawnna a thlen dawn a, mi tam tak eizawnna a siam ngei dawn a ni," a ti.

Training chu ṭhelrêt chíngtute'n an hlâwkpui ngei a beisei thu sawiin Minister chuan, "Ṭhelrêt hnài tur a tam tawh avangin a chíngtute chu batch khat zela siamin training pek chhunzawm an ni dawn. LRSWC hi ṭhelrêt chingtute tan a inhawng zau a, ṭhelrêt hnái sawngbawlna tur rubber processing unit 100 pawh châwk luh a ni ṭêp tawh," a ti a; 

ṭhelrêt huan enkawlna hmanruate pawh sorkarin tlawm zawkin a pek chhàwn dawn thu a sawi.

R Lalzirliana chuan, Mizote chu hnam taima an la ni reng a, sorkar aṭanga kawng kawhhmuh an nih chuan ṭhelrêt mai ni lo, thil dangah pawh an hlawhtling thei dawn tih a chiang tih a sawi a, "Ṭhelrêt enkawl kawngah a chíngtute'n mithiam thuràwn an ngaih pawimawh a ngai a, sorkar mithiamte pawhin phûr taka kut hnathawktute an puih a ngai bawk a ni," a ti.

Report-a tarlan danin, tun dinhmunah Mizoramah ṭhelrêt huan nei mi 4,207 awm meka ngaih a ni a, chu'ng zinga mi 1,300 vel chu Mizoram Rubber Planters’ Association (MIRPA) member an ni. MIRPA chhût danin, Mizoramah ṭhelrêt kûng 15,00,000 vel a awm mek a, hnài theih kûng 2,00,000 chuang a awm a ni.