ṬHALAITE NUN CHEP

Mihringte hi thlan tui far zawih zawiha rim taka thawka ei zawng tura siam kan nih rualin, tunlai khawvel changkang tawh takah hi chuan thlan tui far lo zawng, ngaihtuahna thluak hmanga thiamna leh finna hmang ṭangkaiin thlan tui far kher lo pawhin ei kan zawng thei ta. Chutih rualin ei leh in, silh leh fen ni tin kan mamawh bakah intihhlimna te, tui hleuh, lam leh zai, nulat tlangval inlêm leh nawmna chi hrang hrang thlengin kan mamawh ṭhin a ni. Ṭhalaite hian nuam tâwlna tur kawng hrang hrang an mamawh ṭhin. Ram dangte angin kan ṭhalaite hian hringnun chen tur hrang hrangte an nei ṭha tawk lo va, an nun hi a chêp êm êm mek niin a lang.

Kan ṭhalaite tan hian hunawla intihhlimna hmun (recreation centre) hi mi ramte angin kan nei ṭha ve lo hle. Sorkar hian hetiang lam hi an ngaihtuah ngai lo nge, an dawn tawi hle zawk tih hi ngaihtuah tham a awm. Aizawl khawpui chhungah Recreation Centre ang ve deuh 10 vel a awm ve a, mahse, hengte pawh hi private sector vek a ni a, public sector a vang hle. Mi hausa fate tan awlsam tea hman ṭangkai theih ni mah se, mi rethei fate tan erawh hman ṭangkai ve theih a ni meuh lo. A thlawna hman theih hunawla intihhlimna hmun turte hi sorkar hian ṭhalaite tan siam ve zut se, State Assembly Budget-ahte hian sum ren lovin budget tam tham deuhte dah ve thei se, kan ṭhalaite hian nuam an ti ngawt ang. Mahse, mi hausaten sumdawnnana an siam tih loh chu ṭhalaite tan sorkar hmalakna hmuh tur a tlem hle.

Show, movie, emaw, mi tihlim thei performance emaw hi kan Aizawl khawpuiah hian intihhlimna hmun cinema hall, movie theater, club leh bar-te a awm meuh lo va, mimal sumdawn nana an siam a nih ngawt loh chuan sorkarin ṭhalaite hmakhaw ngaia hma a lakna hmuh tur a vang hle. Hengte hi mahni in ṭheuhah enin thlir thei tho mah se, kalchhuaha ṭhiante, chhungte leh mi dangte nen boruak thawl leh thawveng, zangkhai tak hnuaia khawsak leh thlirho tura vah chhuahte an chakin an thlahlel ve ngawih ngawih ṭhin. Nula tlangval tan bik phei chuan mahni duhlaite nena hlim taka hun hmanna remchang a ni lehzel bawk nen, infiamna hmun playground etc. ringawt buaipui bik lovin entertainment centre chi hrang hrangte nen, a inbuk tawkin hmalak ni se a lawmawm ngawt ang.

Tarlan tak ang khian ṭhalai rual nun chep takte hian hunawla intihhlimna hmun, recreation centre leh entertainment centre kan neih mumal loh avangin Aizawl khawpui dai leh a chhehvelah an hunawl hmangin an han chhuak vak (outing) ve bawk ṭhin na a; YMA, JAC, leh Police ten umzuiin an veh reng a, tang motor (prison van) nen inchhawpin a tiralkhel thei ang leh, rikrap thei ang berin an chângin an ûm darh a, thlaphang hlauhlawp leh khur zawih zawih chungin an tlanchhe chawn chawn ṭhin. Kan ṭhalaite nun hi a chepin a va'n ralmuang lo tehlul êm! Chuvangin, ṭhalai ṭhangthar duhawm tak takte dikna chanvo heti taka Sorkar leh khawtlangin kan rahbehsak a, zalen lo taka kan hual chep mek hi bansanin, an hun hlimawm tak hmang ve thei tura zalenna pek ve a va hun tawh tehlul êm!

- Dr. C. Lalrampana