Aizawla thlai man sawiho
Commerce & Industries director J Hmingthanmawia kaihhruaiin tunlaia Aizawla thlai thar man to lutuk chungchang November 7, Inrinni khan sawiho a ni a; Commerce & Industries leh Horticulture department hotute bakah, Mizoram Consumers Union (MCU) hruaitute leh thlai thar khâr chhâwngtute an tel.
Commerce & Industries Director chuan, Mizoramin harsatna a tawh mek remchanga hmanga thlai man tito lo turin thlai zuartute leh khâr chhâwngtute a ngen. Thlai zuartute leh khâr chhâwngtute chuan, diesel/petrol vàn avangin lirthei hman man a to thu leh, thlai thartute'n tito bik lo se an duh thu an sawi niin sorkar thuchhuahin a tarlang.
Ṭhutkhawmah hian Serchhip district-a thlai tharte mumal zawka a hralh dan tur enpui turin Serchhip DHO an ruat a, Sihphir chhehvela thlai tharte enpui turin Aizawl DHO leh Commerce & Industries hotute leh MCU hruaitute ruat an ni. Tuipuia thar tomato-te tláwm zawka mipui hnena a thlen theih dan tur zawng turin Khawzawl DHO ngen a ni bawk.