Ramri-ah hûi khâwm zawnga che turin MPCC-in Mizoram sorkar an beisei

Mizoram Pradesh Congress Committee (MPCC) Media department hotute chuan November 7, Inrinni khan Aizawl Press Club-ah thuthar thehdarhtute an kâwm a; ramria buainaah political party, tlawmngai pawl, kohhran leh mipui hûi khâwm záwnga che turin Mizoram sorkar an beisei tih an sawi.

MPCC Media chairman Dr Lallianchhunga chuan, tun hnaia ramria buaina a awm ṭan tirh aṭangin MNF sorkarin buaina a hmachhawn dan ngun takin an thlithlai reng tih a sawi a, "Ramri buaina hi sorkarna siam mektu ringawtin a chinfel theih a nih loh dan leh mipui ṭanrual leh thlàwpna a pawimawhzia hriain, Congress party chuan sorkar dem loin 'Ṭanrual hun a ni' tiin kan au. Mizoram sorkar pawh political party, NGO, kohhran leh mipui min hui khawm zawnga che turin kan beisei," a ti.

Dr Lallianchhunga chuan, MNF sorkarin tunlaia ramria buaina a hmachhawn dan an thlirin, mipui thlavâng hauh ṭula an hriat thu sawiin, "Sorkar thil tih dan sawisel tumna ngawr ngawr ni loin, eptu party kan nihna anga mawhphurhna kan neih vang a ni," a ti a; mipui thlavâng hauh nan rawtna an siamte chu ram hmasawnna leh mipui himna atan sorkarna chelhtute’n an tihhlawhtlin theih chuan Congress party an lawm hle tur thu a sawi. 

October 28, 2020 aṭangin Lailapur-ah Mizoram châk lâkna kawngpui NH-306 an dang a, Mizo driver leh mi eng emaw zat Silchar Mizoram House-ah an la táng mek tih sawiin Dr Lallianchhunga chuan, "Khaw pakhata mi tlemtêin state khat kawngpui heti chen an dang chat hi hnam anga mualphona a ni. Kan hnam zahawmna humhim nan lirthei táng mekte hi an thil phurh nen him taka Mizoram an thlen theihna turin Mizoram sorkarin chhanchhuahna kalpui vat rawh se," a ti. 

MPCC hruaitute chuan, ramria buaina leh a kaihhnawiha Assam-a kawngpui dan vanga Mizoramin harsatna a tawh chungchangah, Mizoram mipui, kohhran, NGO leh political party zawng zawng an ṭang rual a ni tih lantir nan sorkarin 'Huapzo meeting' ko se an duh thu an sawi a, "Hei hi a harsa a nih pawhin, all party meeting tal ko ngei rawh se," an ti.

→    Assam Chief Secretary ten 'Mizoram leh Assam ramri chu kum 1986-a MNF leh India sorkarin an pawm tawh ramri, India danpuia chuang, constitutional boundary hi a ni' an ti. Hei hi Mizoram sorkar hian chháng lêt se, kum 1986-a inremna ramri an tih hi Mizo mipui tan pawm theih a nih loh dan leh Mizoramin a pawm ramri fiah taka tarlanna nen Assam sorkar hrilhfiah rawh se.

→    Vairengte leh a chhehvel khuaa mipuiin Mizoram armed police force-te duty-na tur leh inkah a awm palh pawha an ṭanhmun tur an siamsakte chu Mizoram sorkar aṭanga tuaihnûm belhna a awm lo. IR-te hian an pawisa thawh khawmin, ei leh in senso an intum a, a chángin khawtlang leh mi ṭhahnemngaite tanpuina an dawng ṭhin. Sorkar hi kan IR police duty-te tan ruahmanna siam turin kan beisei.

→    AMC lockdown leh Lailapur-a kawngpui dan hi Aizawl khawpuiin a tuar na zual hle. AMC area-a cheng khawsak harsa zawkte ṭanpuina tur ruahmanna siam turin Mizoram sorkar kan ngen.

→    Central sorkarin Mizoram leh Assam ramri buaina laia Sashastra Seema Bal (SSB) leh Border Security Force (BSF) dah a tum danah hian Mizoram sorkarin mipui hnenah dik takin puangzar rawh se. Mizoramah CRPF eng emaw zat an awm laia international boundary pawh ni loa BSF duty-tir an ni tur te, an awmna tur leh an duty-na hmun tur te, an thuneihna chinte chiang takin Mizoram sorkarin puangzar se kan duh.