Lok Sabha inthlan puan a nih hnuah Police-in zu litre 7,416 an man tawh

Lok Sabha inthlan tluang tak leh ralmuang taka a kal theih nan Mizoram Police chuan zu leh ruihhlo dangte doin hma an la a, March 16, 2024-a inthlan puan a nih aṭanga April 8 thleng khan zu litre 7,416 an man tawh a, heroin kg. 5.513 an man tawh bawk.

Mizoram Police thuchhuah tarlan danin, Lok Sabha inthlan dawn avangin police-te chuan Mizoram pumah zu leh ruihhlo doin ṭan an la zual mek a; zu bik chu inthlan puan a nih aṭanga April 8 thlengin litre 7,416 an man tawh a, chu'ngte chu rakzu litre 4,773, sapzu lt. 2,577 leh Burma zu (BEDC) lt. 66 a ni.

Rakzu an man chu Rs 23,28,000 hû niin, sapzu an man chu Rs 41,23,200 hû a ni a, BEDC an man chu Rs 49,500 hu niin, beer an mante chu Rs 3,18,000 hû a ni. Zu siamna eng emaw zat tihchhiat a ni a, chu'nga zu siam chhuah theih zat chu lt. 13,340 niin, Rs 46,69,000 hû a ni. Zu leh a kaihhnawih an man leh tihchhiatte chu a vaiin Rs 1,14,87,700 hû a tling.

Mizoram Police chuan March 16 - April 8, 2024 chhungin police station hrang hrangah thubuai 51 an ziak lut a, chu'ng thubuaiah chuan mi 61 an man.

Kumin March 16 - April 8 chhung vekin police-te chuan heroin kg. 5.513 an man a, Rs 1,65,39,000 hû a tling. Methamphetamine kg. 26.469 an man a, Rs 3,44,09,700 hû a ni a; ganja kg. 23.085 man bawkin, Rs 1,15,425 hû a ni. Heng kaihhnawiah hian mi 33 man niin, police station-ah thubuai 25 ziah luh a ni.