MPSC Chairman báng turin phût nawn

Mizoram Public Service Commission (MPSC)-in Combined Competitive Examination 2023 a kalpui danah thil dik lo a awm ngeia an ngaih avangin MZP chuan MPSC chairman JC Ramthanga, IAS (Rtd) chu tun kar chhunga bâng turin an phût.

MZP hian March 27, 2024-a thuchhuah an siama, MPSC-in February 1, 2024-a result a tihchhuah Combined Competitive Exam kalpui danah thil fel lo leh chhui chian ngai a awm nia hriain, MPSC Chairman chu báng turin an lo phût tawh a ni.

MZP hruaitute chuan nimin khan Aizawl Press Club-ah thuthar thehdarhtute an kâwm a; MPSC Chairman chu tun kar chhung ngeia báng turin an phût tih an puang a; a bàn loh chuan hmalak zui zel an tum thu an sawi.

MZP president Lalthianghlima chuan, "MPSC hian an thil tih dik loh hi sawi mâm tum leh evaluator-te tihsualah puh reng loin, an mawhah la se la, MPSC zahawmna humhim a nih zel theih nan te, zirlai hna zawng mekte'n an rinna an nghah zel theih nan MPSC Chairman hi tun kar chhung ngei hian báng se kan duh. Kan ngennain awmzia a neih loh chuan, Chairman bàn a nih ngei theih nan a ṭul angin hma kan la zel dawn," a ti.

Lalthianghlima chuan, MPSC-in tun hma zawngin answer paper-te RTI Act hmanga dil chhuah an remtih ṭhin laiin, kuminah chuan an remti lo niin a sawi a, "A hnuah certified copy pe chhuak loin, 'inspection without photograph' an phal leh a, nawrna avangin a hnuah phone-a thlalak an phal leh chauh a ni," tiin a sawi.

MZP TARLAN DANGTE

▶ Combined Competitive Examinations hnuhnung berah thil dik tâwk loa hmalakna a awm ngeiin kan hria a, kan ngai thutak hle. Mains exam paper ṭhenkhatah correcting fluid-te hman a ni a, mark pek tawh sa thaichhiatna leh mark tihdanglamna hnuhma ṭhahnem tak a awm a; hei hi hmun hnih/khat mai ni lo, hmun tam takah a awm.

▶ MPSC hnuaiah sûlhnu mak tak tak leh sawi neuh neuh a awm pawi kan ti tak zet. Exam beitu mi ṭhenkhatte chunga thil thleng ang hi mi dang chungah thleng tawh lo se, lungawi lohna neite an dawnsawn danah pawh an inenfiah a ngai hlein kan hria.

▶ MPSC-in thil dik lo leh fel lo siamṭhat tuma hma latute, 'tlin loh vanga rilru na thil tih' ang lekah a chhuah fo. Dik lo thei lo, tisual ngai lo leh sawisel thiang lo anga an inchhâl chunga case an nei fote hi inenfiah se kan duh.

▶ MPSC-ah thil dik lo tak tihna remchang kawngka inhawng hi pawi kan ti.