General Observer Lawngtlaiah

Mizorama Lok Sabha inthlan tura general observer Dr Nipun Vinayak chuan nimin khan Lawngtlai a tlawh a, inthlan kaihhnawih mawhphurtu hrang hrangte DC conference hall-ah a kâwm.

Dr Nipun Vinayak chuan, inthlan buaipuitute chu fimkhur taka engkim kalpui tur leh team hrang hrang karah thawhhona ṭha neih tum turin a chah a; Mizoram chu state ralmuang a nih avangin inthlan felfai leh muanawm tak a awm leh ang tih beisei chungin, a chhe ber thleng thei lakah pawh inralrin tho a pawimawh thu a sawi.

General Observer hian Lawngtlai District Election Office-in SVEEP hmalakna hnuaia vote thlak tura mipui zirtirna hlapui music video buatsaih a tlangzarh a; Lawngtlai College-a EVM leh VVPAT dahna strong room a enfiah bawk.

LAWNGTLAI DISTRICT DINHMUN

☑ Assembly bial pathum - Tuichawng, Lawngtlai West leh Lawngtlai East a awm.

☑ Voter 92,455 an awm; mipa 46,150 leh hmeichhia 46,305 an ni.

☑ Polling station 181 a awm a, 116 chu hmun hla zuala awm a ni.

☑ Hmeichhe hlangin an enkawl tur polling station 20 a awm.

☑ Ṭhalai hlang enkawl tur polling station pathum a siam a ni.

☑ Model polling station pathum leh unique polling station pahnih ruahman a ni.