Home-in BSF chungchang sawifiah; Kolasib-in an khua-a dah an duh lo

Mizoram sorkara Home department chuan thuchhuah siamin, Border Security Force (BSF) company pathum Mizorama an lo thlen chungchang a sawifiah a; BSF chungchangah thu dik lo lêng vel a tam thu an tarlang. Hetihlai hian Kolasiba BSF-te dahna vengte chuan an venga BSF dah hi an duh loa, lungawi lohna thuziakte an tar a ni.

Kolasib MSU pawhin thuchhuah siamin, khaw chhunga BSF-te dah an duh loh thu an tarlang a, "Mizoram chhung ngeiah pawh force mi tam zawkten hri hi an pu kual nasain an buai nasa hle a ni. Kan police-te'n dan leh hrai an buaipui theih laia BSF-te rawn dah hi mipui tan a him lo zawkah kan ngai. Ramri buai avanga BSF te hi rawn dah tur an nih pawh in town area ah ni lo ramriah ngei awmse kan duh ," an ti.

Home department tarlan danin, tun hnaia Assam sorkar official leh Assam lam mi ṭhenkhatin Mizoram chhunga thlám an hâl leh thlai an tihchhiat chungchang leh, Covid-19 duty post an tihchhiatte leh Vairengte dáia Mizoram police dahte avangin Assam sorkarin an state chhungah Mizoram sorkarin encroachment an rawn ti, tiin, Mizoram police an inhnuhdawh theihna turin Mizoram leh Central sorkar an nawr a ni. Chuvang chuan Mizoram luhká zawng zawngah kawngpui an dang bawk.

Ramri hrûla boruak sosang zel tidài turin Ministry of Home Affairs (MHA) chuan Mizoram sorkar kutah BSF company pathum a dah thar a, BSF-te chuan Mizoram an thleng tawh hlawm. Ramri bula an awmna tur peih a la nih loh avangin an awmna tur buaipui mek a ni. BSF-te chu an awmna tur peih a nih hma chu Kolasib leh Bilkhawthlirah dah lailawk an ni ang.

Thu dawn danin, BSF-te chu Kolasib-ah chuan Diakkawn Middle School-I leh RSTC Boys Hostel-ah an awm a, Bilkhawthlirah chuan Middle School-III leh Primary School-IV ah an awm thung.

BSF-te chu duty-a an chhuah hmain Covid-19 an vei leh vei loh endik hmasak tum a ni a, hripui vei lote chiah duty tir tum a ni. BSF ho awm lailawkna hmunte chu Kolasib DC chuan containment area-ah November 6, 2020 khan a puang bawk.