Pawikhawihna vanga mi kut tuarte hnenah zangnadawmna sem a ni

Aizawl District Legal Services Authority (DLSA) chuan nimin khan Aizawl District Court conference hall-ah pawikhawihna vanga mi kut tuarte hnenah zangnadawmna an sem a, Gauhati High Court judge Justice Michael Zothankhuma'n a hmanpui.

Zangnadawmna hi The Mizoram Victims of Crime Compensation Scheme, 2016 (Amendment) hnuaiah sem a ni a; pawikhawihna vanga mi kut tuar te, pawngsual tâwkte leh ramtuileiloa awmte bakah, mitthi chhungte hnenah pek a ni ṭhin.

Inkhawm hi Aizawl DLSA secretary Lalrochami Ralte-in a kaihruai a; Gauhati HC judge Justice Michael Zothankhuma, Mizoram State Legal Services Authority executive chairman ni bawkin mi 22 hnenah zangnadawmna Rs 65,75,000 a sem. Zangnadawmna dawng zinga naupang kumtlinglote chu an bank account-ah kum an tlin huna lak chhuah turin dahsak a ni.

Lalrochami Ralte chuan, pawi­khawihna vanga kut tuarte tan zangna­dawmna dilna engtik lai pawhin DLSA pisaah thehluh theih a nih thu a sawi a; dilnate chu thuneitute'n an ngaihtuah a, dawng thei tura an ngaihte an thlang ṭhin tih a sawi bawk.

Inkhawmah hian Aizawl DLSA chairman Joel Joseph Denga pawhin thu a sawi a ni.